Ang pagaw kun mohagawhaw (1)
Kining mosulti kita nga pugson gyud bisa’g sakit na ang tutonlan, nga usahay gani mawad-an na sa tingog, igo na lang mohagawhaw kay napagaw nga namad-an sa likido ang kuwerdas sa paningog (vocal chord). Menus na sa laway nga nagsilbing lubrikante nga dili magasgas ang tutonlan tungod sa kainit nga kanunay mahago o matandog sa pagkaon ug sa pagsulti.
Gikinahanglan sa kanunay moinom gyud og daghang tubig, bisa’g dili mokaon o motabi, aron ang tisyu permi abunado sa laway, nga mabugnawan ang kondisyon sa tutonlan. Dili kay unya na moinom kun mapagaw o karas na paminawon kay mosamot nga manakit ang tutonlan nga mohubag o ma-impeksyon na.
Sa ingon niini nga sitwasyon, nga dili lang ni matagad, kalagmitan saw-on kini sa problema sa kanser sa tutonlan nga maamong sab, ma-viral impeksyon ang baga (respiratory tract). Ayaw paabota ang indikasyon niini nga motumaw ang permi hilanat, sip-on, sakit o maglabad ang ulo ug mga panakit sa likod.
Tungod sa panakit sa tutonlan, dili na kita komportable sa pagkaon ug pag-inom, unya dili na sab katarong o makalahutay sa pagtabi. Haskang hasola ra ba kun mopalyar na ang atong tutonlan (laryngitis). Daghang sistema sa lawas ang maaberiya, kay anhi moagi ang tanang mga panginahanglanon sa maayong panglawas.
Kun sa pamati nimo sa imong tutonlan igo lang kini nahago, ipahuway kay mawala ra kini sa pipila ka adlaw. Pasidaan kini sa imong pag-atiman dayon. Kun kanunay na ikaw makabatyag og dili maayong kondisyon, daghan kana og pamation nga problema sa lawas, kay gamay’ng butang kini makakomplikar.
- Latest