‘Takas sa Talisay’ karon

MANILA, Philippines - Saulugon sa mga Talisaynon karong adlawa ang ika-72 ka tuig nga kagawasan gikan sa mga kamot sa langyaw nga gitawag og “Takas sa Talisay.”

Sugod alas 6 sa buntag sugdan ang programa pinaagi sa Santos nga Misa sa Larawan Beach, Poblacion, Dakbayan sa Talisay.

Gilauman nga motunga ang mga representante sa nasud sa Amerika ingon man sa Japan. Human sa programa masaksihan sa katawhan ang re-enactment sa gubat pinaagi sa mga tinun-an sa Talisay City College (TCC).

Alas 12 sa udto mosalida sab ang kababayen-an alang sa beach volleyball tournament ug sa gabii aduna’y programa nga maoy motapos sa kalihukan.

Si Supt. Emerson Dante, hepe sa Talisay City Police Station, nagkanayon nga dili mokompiyansa ang katawhan sa mga kiriwan og kamot tungod kay ang bagang duot sa katawhan ang ilang paborito aron makapamiktima.

Dugang ni Dante nga angay sab nga magbantay ang katawhan sa ilang pamilya nga mangaligo sa dagat karong adlawa tungod kay daghan ang mga tawo nga lisud mabantayan.

Nasayran nga wala’y programa nga gihimo sa niaging tuig tungod kay natumong kini sa Sabado Santo sa Semana Santa. - /GMR) (BANAT NEWS)