Mag-ina, 1 pa, minasaker sa Caloocan
MANILA, Philippines - Tatlo katao ang nasawi kabilang ang mag-ina, habang sugatan naman ang isang 5-anyos na paslit makaraang pagbabarilin ng mga armadong kalalakihan na pumasok sa kanilang bahay sa Caloocan City, kamakalawa ng gabi.
Dead-on-the-spot sanhi ng mga tinamong tama ng bala sa ulo at katawan ang mga biktimang sina Wilma Liwanag, alyas Ada; ang anak nitong si Aries, 31 at ang live-in partner ni Wil- ma na isang alyas Boy.
Ginagamot naman ang anak ni Aries na si Albert Liwanag, 5-anyos sa Dr. Jose N. Rodriguez Memorial Hospital nang tamaan ng ligaw na bala sa kaliwang balikat.
Blanko pa ang pulisya sa pagkakakilanlan ng mga suspect habang nagsasagawa pa ng follow-up operation hinggil sa insidente.
Sa imbestigasyon nina Homicide investigators PO3 Rommel Caburog at PO2 Philipp Joseph Reglos, ng Caloocan City Police, naganap ang insidente alas-9:50 ng gabi sa loob ng bahay ng mga biktima sa Block 3 Lot 8 Phase 9 Package 7 Brgy. 176, Bagong Silang ng naturang siyudad.
Napag-alaman na nagpapahinga ang mga bik-tima nang pwersahang pumasok ang mga suspect na nakasuot ng bonnet at face mask, kung saan winasak ng mga ito ang pintuan ng bahay ng mga nasawi.
Dito na nila pinagbaba-ril ang tatlo na naging dahilan ng agarang kamatayan ng mga ito.
Pagkatapos ng pamamaril ay mabilis na tumakas ang mga suspect at ang batang biktima ay dinala ng mga kapitbahay sa naturang ospital nang tamaan ng ligaw na bala.
Narekober ng pulisya sa pinangyarihan ng insidente ang apat na basyo ng bala ng kalibre .45, plastic sachet na naglalaman ng hinihinalang shabu at drug paraphernalia.
Ayon sa Caloocan City Police, nasa ‘‘drug watch list’’ nila ang mga pinatay na mga biktima.
Patuloy pa ang isina-sagawang imbestigasyon sa insidente.
- Latest