Tag-ulan magsisimula na
MANILA, Philippines - Papasok na ang panahon ng tag-ulan sa huling linggo ng buwan ng Mayo.
Ito ang sinabi kahapon ni weather specialist Aldzcar Aurelio ng Philippine Atmospheric Geophysical and Astronomical Administration (Pagasa) dulot na rin ng mga nararanasang pag-ulan sa bansa lalo na sa Metro Manila nitong mga nagdaang araw.
Sa panayam, sinabi ni Aurelio na ang nararanasang pag uulan sa ngayon ay senyales na papasok na ang rainy season.
Gayunman, sinabi ni Aurelio na kahit na pumasok ang tag-ulan ay hindi pa kumakawala ang El Niño phenomenon o panahon ng tagtuyot.
Ayon sa Pagasa, asahan na ang madalas na pag-ulan sa huling linggo ng Mayo dahil sa buntot ng cold front na nakakaapekto sa Luzon habang inter tropical convergence zone (ITCZ) naman ang umiiral sa southern Mindanao.
Magiging maulap naman ang papawirin na may pag-uulan sa Visayas at kabuuan ng Mindanao gayundin ang Ilocos Region, Cordillera, Cagayan Valley at Central Luzon ay makakaranas ng mga pag ulan.
Sa Metro Manila, asahan ang thunderstorm kung kaya’t maulan sa hapon o gabi. Gayunman, wala namang namomonitor ang Pag Asa na bagyo na maaaring pumasok sa bansa.
- Latest