2016 CVIRAA meet buksan na karon
CEBU, Philippines - Liboan ka mga atleta, opisyales ug coaches gikan sa nagkadaiyang dapit sa rehiyon ang magdangop karong adlawa sa dakbayan sa Naga sa pormal nga pagbukas sa 2016 Central Visayas Regional Athletic Association (CVIRAA) Meet didto sa Teodoro Mendiola Sr. Sports Oval.
Ubos sa tema nga “Go With A Unified Spirit Towards Excellence in Sports”, ang lokal nga kagamhanan sa Naga ubos sa liderato ni Mayor Valdemar ‘Val’ Chiong ug ang iyang mga konstituwente maghiusa og puwersa aron pag-abi-abi sa tanang mga delegado aron mamahimo kining espesyal ilabi na kay mao kini ang labing unang higayon nga sila mi-host sa maong higanteng kompetisyon.
Si Cebu Governor Hilario Davide III gipaabot sab nga motambong sa seremonyas uban ni DepEd-7 Officer-in-Charge Director Juliet Jeruta.
Ang duha ka garbong atleta sa Naga nga sila si Vince Anton Louise Alforque ug John Clyde Laquio adunay pagahuptan nga papel sa pagbukas. Si Alforque, gold medalist sa Milo Little Olympics, maoy mangu sa oath of amateurism, samtang si Laquio maoy modagkot sa 'friendship cauldron' sa CVIRAA.
Mga delegado gikan sa 13 ka dibisyon sa rehiyon makasaksi sab sa talento sa taga-Naga gumikan kay ang mga mananaog sa Dagitab Festival mopahigayon man og usa ka playground demonstration.
Ang tanang mga duwa ugma pa sugdan sa nagkalain-laing binyu didto sa Naga gawas sa swimming nga anha ipahigayon sa Cebu City Sports Center.
Gawas sa host Naga ug perennial champion Cebu City Niños, lain pang mga entranteng dibisyon mao ang Cebu Province, Bohol, Carcar, Danao, Bogo, Lapu-Lapu, Mandaue, Siquijor, Tagbilaran, Talisay ug Toledo.
Sugod karong tuiga, wala na’y labot ang Dumaguete ug uban pang dibisyon sa Negros Oriental sa CVIRAA gumikan kay nasakop na man kini sa laing rehiyon uban ang Negros Occidental. (BANAT PALARO)
- Latest
