Mga hinungdan sa kapakyasan Maoy

Maoy naandan sa kadaghanan, nga kon duna kita’y maayong ideya o kahigayonan, malaumon kaayo nga kini mahimo nato diha sa kasayon.

Mao nga mogitib ang panghunahuna sa mga pangandoy. Ang nakaapan lang kay kontento na sa pagpaabot sa swerte nga wala’y gihimo’ng lakang aron kini molipang nga palambuon diha sa paningkamot. Natural ang mapaabot mao - kapakyasan.

Apan ang kalampusan nga ato ron tukion, mao ang kaharuhay nga tagamtamon ang katam-is nga mabuhing malipayon. Kay daghan man mga malampuson, nga nabuhi tungob sa kagul-anan. Unsaon sagad niini, gilaktod lang kini sa pag-angkon, bisan og kalapasan sa kinaiyahan.

Gani, nahimo pa silang gikasinahan nato, gumikan sa kamaayo nila modiskarte sa pagpakabuhi. Busa atong palawman ang pagtugkad sa mga hinungdan, nga unta molampus na apan sa kaulahian maoy naangkon ang kapakyasan. Ania susihon nato ang kaugalingon, aron itukma kini nga kahimoan og kausaban.

* Katapulan – binuhat kita’ng tawo aron palihokon, kay kun wala ta’y buhaton, mao la’y maangkon ang maulipon sa kawad-on. Maayo pa ang tawo’ng estatuwa, bisa’g wa maglihok nakabarug gihapon nga giugbok. Ang tawong buhi, kinahanglan magkugi alang sa iya’ng panginahanglan sa pagpakabuhi.

* Kahadlok o Kabalaka – ingon sa may panagana kita mosulay sa gituhoan nga makaayo, apan naglabi ang katalaw sa pagbuhat niini. Kulang sa pagtuo ug sa determinasyon, nga dawaton ang epekto sa kasaypanan sa pagsulay. Magpositibo kita sa unsa ma’y reyalidad sa buot nato nga palambuon.

* Wala’y tumong – ang panglantaw nga wa nakapukos sa tumong, magsigi la’g tuyok nga di kairog sa unahan, aron maabot nga matuman ang misyon  ug katuyoan nato sa kinabuhi. Mawad-a’g kapuslanan ang atong mga paghago.