Urduja gipangandaman sa LGUs

CEBU, Philippines — Higpit karon nga gi-monitor sa mga local government units sa epektong dala niining bagyong Urduja nga ginaingong magdala og lapad nga pag-ulan sa Kabisay-an nga posibleng moresulta sa pagbaha ug pagdahili sa yuta.

Nagkanayon ang pangulo sa Cebu City Disaster Risk Reduction Management Office (CCDRRMO) Nagiel Bañacia ang Quick Response Team naka-blue alert karon tungod sa bagyong Urduja.

Bisan paman og layo ra ang bagyo sa Cebu City hugot gihapon silang nag-monitor sa dagan sa panahon.

Gipahinumduman niini ang publiko nga  motawag gyud sa ilang barangay kon dunay emerhensiya.

Mahitungod sa pagsuspenso sa klase kini miingon nga desisyon kini sa prinsipal sa mga tunghaan ug barangay officials kon modeklarar sila og wala’y klase. Si Konsehal Dave Tumulak, chairman sa Committee on Public Order and Safety mipahinumdom sa mga barangay kapitan nga i-activate na ang Barangay Disaster Council. Ang konsehal miingon nga bantayan gyud kining landslide ug flood prone areas kay gipaabot nga molanat pa ang dautang panahon hangtud sa adlaw’ng Sabado.

Samtang sa dakbayan sa Lapu-Lapu ug Mandaue susamang pangandam gihapon ang gihimo. Sa Dakbayan sa Lapu-Lapu gibantayan ang mga barangay nga pirmeng bahaon ug mga coastal barangays ug kabalayan nga baluron sama sa Barangay Basak nga pirmeng bahaon, Agus, Maribago, Marigondon, Ibo ug Mactan.

Gi-monitor usab ang kahimtang sa isla sa Olango nga makaepekto usab sa pagpanagat nga naglakip sa barangay Cao-oy, Santa Rosa, Tingo, Caohagan, San Vicente, Pangan-an, Caubian ug uban pa.

Samtang ang Bantay Mandaue nga gipangulohan ni CDRRMO chief Felix Suico nagbantay  sa Maguikay, Paknaan,   Tingob,  Canduman,  Basak, Labogon, Casili,  ug uban pa nga kuyaw usab nga masinati ang pagdahili sa yuta. Sa nasayran sa Banat News nga ang  Philippine Atmospheric Geophysical and Astronomical Services Administration (Pagasa) mipaubos na sa amihanang bahin sa lalawigan sa Sugbo ug apil na ang isla sa Bantayan sa Storm Signal Number 1.

Samtang si Alvin Santillana pangulo sa CDRRMO sa Talisay mihangyo sa mga kapitan sa 22 ka barangay sa siyudad monitoron ang ilang mga konstituwente ug ang mga peligrong lugar (BANAT NEWS)