Jail personnel nihimakak sa pasangil

CEBU, Philippines — Gihimakak sa dose ka jail personnel sa Cebu Provincial Detention and Rehabilitation Center (CPDRC) ang mga pasangil batok kanila kalabot sa giingong pagpalusot og mga kontrabando ug ilegal nga drugas sa sulod sa prisohan.

Ang maong mga jail personnel gipaubos sa 30 ka adlaw nga suspensyon ni Gobernador Hilario Davide III niadtong Oktubre, nakabalik na sa ilang trabaho.

Niadtong Miyerkules, atol sa preliminary conference nga gihimo sa Committee on Discipline and Investigation (CODI),  gihimakak nila ang mga pasangil matud pa ni Atty. Orvi Ortega ang chairman sa CODI.

Matud ni Ortega nga lain-lain ang reklamo batok sa mga personnel base sa “anonymous letter” nga gipadala ngadto sa gobernador. Ang maong sulat gikan sa nagpaila nga “doglover” diin namasangil kini sa maong mga personnel.

Nunot niini, ipatawag sa CODI sa sunod nilang session ang mga kanhi nangulo sa CPDRC sama nila ni Romeo “Bobby” Manansala, Dr. Gil Macato, Roberto “Bobby” Legaspi ug ang acting jail warden karon nga si Audesti Miguel. “So that we would be able to come up with questions in connection with the answers that they (CPDRC personnel) have given. We wanted to have a thorough investigation on the matter”, matud ni Ortega. (BANAT NEWS)