Kampo ni Lagon mihangyo sa korte aron siya makalingkod

CEBU, Philippines — Niduso na og motion for writ of execution si Daphne Lagon ngadto sa Regional Trial Court (RTC) Branch 59 sa dakbayan sa Toledo kagahapon.

Kini aron nga makalingkod na siya isip mayor sa Tuburan human mihukom ang korte nga pabor kang Lagon nga maoy tinud-anay nga midaog pagkamayor sa lungsod niadtong 2016 mayorality election.

Matud ni Atty. Delon Urot ang abogado ni Lagon nga alas 8:30 kagahapon sa buntag sila ni-file sa motion of writ of execution pending appeal sa RTC Branch 59.

Si Atty. Lionel Marco Castillano ang provincial election supervisor nagkanayon nga kun makakuha si Lagon niini mamahimo siya makalingkod.

"All decision can only be executed if there's writ of execution," matud ni Castillano.

Matud ni Castillano nga aron pagpugong sa paglingkod ni Lagon si Mayor Democrito Diamante mamahimong maka-file of notice to appeal with prayer for temporary restraining order (TRO) ngadto sa Commission on Elections (Comelec) central office. Matud ni Castillano nga kun dili makauyon ang duha ka habig sa decision sa division nga modungog sa kaso mamahimong mo-file ang duha ka partido sa Comelec en banc hangtod sa Supreme Court. (BANAT NEWS)