Nisuwat bahin sa K-Trash gustong ipasusi kon tinuod

CEBU, Philippines - Mipadala og position letter ang buhatan ni Cebu City Mayor Tomas Osmeña ngadto sa tsirman sa Committee on Ecology, Kong. Estrellita Suansing bahin sa gihimong inquiry kabahin sa importasyon sa singko milyones ka kilong basura gikan sa South Korea.

Sa suwat sa mayor, siya nagpasalamat sa oportunidad nga makapresentar sa iyang habig bahin sa isyu nga matud pa niya wala untay labot ang Cebu City gawas lamang nga kini anha gidunggo sa pantalan sud sa hurisdiksyon sa siyudad.

Matud pa sa mayor, dili makatarunganon nga giduhig ang dakbayan ug dili tinuod ang gipasangil nga ang maong mga basura anha dad-on sa Inayawan nga may pagtugot sa mayor.

Ang nagreklamo nagpailang Felix S. Lopez Jr. nga taga Greenfield, Inayawan, Cebu City nga gipadala sa nagkalainlaing ahensya sa gobiyerno apil na ni Sec. Michael Lloyd Dino sa Office of the Presidential Assistant for the Visayas. Gusto usab mahibaw-an sa siyudad kon pinirmahan ba ang suwat kay matud pa ang ilang nadawat nga kopya walay pirma ni Lopez ug wala silay dokumentadong ebidensya bahin sa alegasyon.

Nangutana usab si Osmeña kon gitan-aw ba og maayo kon tinuod ba gyung adunay “Felix S. Lopez Jr.” Gipatawag ba kini aron mohatag og katin-awan bahin sa mga alegasyon.

Nangutana ang mayor kon gisusi ba og maayo sa OPAV ang suwat kon  tinuod ba gyud ang pagkatawo sa nagsuwat una pa gipasa ngadto sa mas taas nga ahensya sa gobiyerno.

Matud pa ni Osmeña si kanhi Cebu Customs Collector Rico Rey “Koko” Holganza lunlong supporter ni Pres. Duterte apan wala kini makita ni Dino diha sa suwat nga gipasanginlan ang kanhi kolektor nga “financial supporter of Mar Roxas.”

Gusto karon mahibaw-an sa mayor ang kamatuoran bahin sa maong kontrobersiya kay matud niya di makatarunganon nga iduhig ang siyudad niini.

Hasta ang pagrelibo kang Holganza gikwestyon usab sa mayor kon may koneksyon ba sa maong isyu. (BANAT NEWS)