P52M sa inayawan landfill napugngan

CEBU, Philippines – Pakyas pagkombinsi ang mayoriya sa konseho sa Dakbayan sa Sugbo nga sakop sa Bando Osmeña Pundok Kauswagan (BOPK) sa taga oposisyon nga aprobahan ang P52.4 milyones alang sa rehabilitasyon sa Inayawan Landfill.

Dunay kabalaka ang habig sa Barug Team Rama sa gitinguha nga rehabilitasyon ni Konsehal Eugenio Gabuya Jr., ang chairman sa committee on public services.

Si Konsehal Jose Daluz III niingon nga angayan nga mag-una ang safety closure plan una ang rehabilitasyon aron ang uban maatiaman og tarung.

Nangutana sab si Daluz kung ang plano resulta ba sa feasibility study nga dunay budget nga P2.5 milyones.

Tubag ni Gabuya nga mao kini ang rekomendasyon sa Cebu City Environment and Natural Resources Office ug usa lang kini ka partial rehabilitation plan sa landfill.

Sa niaging tuig, ang konseho nitagana og P85 milyones alang sa rehabilitation ug ang P2.5 milyones niini alang sa feasibility study aron ang kagamhanan sa siyudad dunay klarong ideya kon unsa ang labing maayo nga pamaagi sa pagsulbad sa problema sa landfill nga nisobra na sa kapasidad sa basura nga angay ilabay.

Ang kanhi chairman sa committee on environment, Konsehal Joel Garganera, kinsa nisang-at og Writ of Kalikasan sa Court of Appeals, nibutyag nga ang regional director sa Environmental Management Bureau-7, Engr. William Cuñado, nga mao sab ang co-chairperson sa Multipartite Monitoring Team, giingong wala kadawat og rehabilitation plan gikan sa siyudad.

Nalatid sa closure order sa CA nga ang kagamhanan sa siyudad mohatag og monthly report sa EMB-7 alang sa rehabilitasyon sa landfill nga kapin sa walo ka buwan na nga gipasirad-an.

Nidugang si Garganera nga ang kantidad sa proposed plan nga P52.4 milyones diin dili niini sakop ang kinatibuk-ang rehabilitasyon sa landfill ang mahal ra itandi sa comprehensive program of works and estimates nga gipakita sa EMB-7.

Ang konseho nilaslas sa P600 milyones nga alang sa rehabilitasyon ngadto sa P85 milyones base sa kwentada sa EMB-7.

Si Gabuya nipasabot nga dili kini makalapas sa gipagawas nga kamanduan sa CA sanglit ang City Legal Office nipagawas og opinyon nga dili kini magkasumpaki sa closure order.

Human sa usa ka oras nga pagtuki atol sa sesyon, ang konseho nagkauyon nga ihiklin una ang pag-aprobar sa resolusyon ni Gabuya ug usa ka executive session ang himoon nga tambungan sa kadagkuan sa EMB-7, CCENRO, City Planning and Development Office, Department of Public Services, Department of Health ug konseho sa Barangay Cogon Pardo ug Inayawan. -/GMR (BANAT NEWS)