Kababayen-an sa sugbo motabang sa Marawi

CEBU, Philippines - Mopahigayon og kalihukan ang Gabriela-Cebu nga pundok sa kababayen-an aron makatabang sa mga apektadong tawo sa nagpadayon nga kagubot sa Marawi City tali sa mga bandidong grupo ug tropa sa gobiyerno.

Ang maong kalihukan gitawag kini og Forget Your Ex and Remember Marawi.

Matud sa council member sa Gabriela nga si Belinda Allere nga  kadtong mga importanteng butang ug mga bililhon nga butang nga dili na gamiton sa katawhan mas maayo nga idonar kini nila aron mapahimuslan pinaagi sa garage sale nga ipahigayon.

Dugang pa ni Allere nga ang kita nila sa garage sale gikan sa mga gipang-donar mao sab kini ang gamiton sa pagpamalit sa mga panginahanglanon sama sa sabon, toothpaste, shampoo ug uban pa para sa mga panginahanglanon sa mga tawo nga naa sa nagkadaiyang evacuation center.

Si Allere nitug-an nga ang maong kalihukan sugdan nila sunod semana samtang gihan-ay pa nila ang lugar nga ilang dawatanan sa donasyon. (BANAT NEWS)