Ruiz ngadto sa drug suspect: Pangalani ang ahente

CEBU, Philippines - Gihagit ni Philippine Drug Enforcement Agency-7 director Yogi Filemon Ruiz si Christopher Canlobo nga itug-an ang pangalan sa PDEA agent nga giingong nagdawatan og protection money sa ilegal drugs.

Si Canlobo nga taga Brgy. Bulacao, Talisay City nga nakaeskapo atol sa pagronda sa PDEA-7 niadtong Pebrero 3, apan nadakpan ang iyang asawa ug tulo ka mga sakop nga pulos nasakmitan og daghang ilegal nga drugas. Si Canlobo adunay igsuong polis nga nadestino karon sa Cebu Provincial Police Office mipasangil sa PDEA nga planted ang drugas nga nakuha gikan sa ilang balay.

Siya mipasangil usab nga adunay ahente sa PDEA nga nitawag kaniya kay mangayo og senemanang protection money basta mopadayon lang kini sa iyang negosyo sa pagpamaligya og ilegal nga drugas.

Si Ruiz miingon nga gusto niya mahibaw-an kun kinsa sa iyang mga sakop ang gipasabot ni Canlobo aron iyang makasohan.

Si Canlobo diretsong midangop sa CPPO diin madestino ang iyang maguwang nga si Senior Police officer 3 Nestor Canlobo nga kanhi nadestino sa Talisay City Police Station.

Ang maguwang niini nga polis maoy nangunay kaniadto pagtokhang kaniya ug tungod niadto niundang na siya, kini maoy hinungdan sa iyang akusasyon sa PDEA nga planted ang mga drugas nga nasakmit nga nakaingon sa pagkapriso sa iyang asawa ug tulo ka mga kauban niini.

Giangkon ni Canlobo gikan sa Muntinlupa ug Opon ang shabu nga iyang gibaligya kaniadto ug mokita siya og P65 mil kada adlaw gikan niini.

Matud niya, andam siya magpadakop kung mogawas na ang warrant of arrest. Ang igsuon niini nga polis nitug-an nga iyang nakombinsir ang mga anak sa iyang igsuon nga pasurendiron ang ilang amahan.

Andam  usab siya nga dakpon ang iyang manghod kung mogawas na ang warrant of arrest batok niini. (BANAT NEWS)