Mekaniko nalumos patay

CEBU, Philippines - Patay nang napalgan ang usa ka mekaniko nga nalumos samtang niapas sa iyang silingan nga namukot sa kadagatan sa Barangay Biasong, Dakbayan sa Talisay niadtong Martes sa udto.  Ang namatay mao si Francisco Cara-at, 45, minyo  nga taga Sitio Pungsod, Barangay Lawaan III sa nahisgutang siyudad.

Matud ni PO2 Edwin Campomanes sa Talisay City Police Station nga niapas si Cara-at sa iyang silingan nga si Romeo Baynos sa pagpanguha og isda gamit ang pukot nga gitawag nila og loya.

Dihang nilangoy si Cara-at nabantayan ni Baynos nga nagwara-wara na sa iyang kamot ang naulahi ug nitawag og pakitabang. Dali nga gibuhian ni Baynos ang iyang pukot ug gidali sa pagtabang ang iyang silingan.

Gumikan sa kalisud ni Baynos sa pagtabang hayan naunlod gyud si Cara-at. Nitabang na sa pagpangita ang mga mananagat sa nahisgutang lugar apan pakyas gihapon sila sa pagkuha ni Cara-at.

Paglabay sa upat ka oras nakit-an ang lawas ni Cara-at nga nag-utaw-utaw na sa kadagatan ug gisuwayan pa kini og tabang apan pakyas gihapon ang mga mananambal. (BANAT NEWS)