Unom positibo sa drug test

CEBU, Philippines - Unom ka opisyal sa barangay ug munisipyo lakip na sa usa ka konsehal ang nagpositibo sa ilegal nga drugas atol sa gipahigayon nga drug test sa Cebu Provincial Anti-drug Abuse Office. Upat sa maong mga opisyal ang gikan sa Lungsod sa Moalboal apil ang usa ka barangay kagawad sa nagpositibo niadtong Biyernes.

Matud ni Ivy-Durano Meca ang pangulo sa CPADAO nga 221 ka mga kawani lakip na niini ang mga tanod, konsehal ug kapitan ang ilang gipaubos sa drug test.

Samtang duha ka mga empleyado sa Lungsod sa Medellin ang nagpositibo atol gihapon sa drug test niadtong Lunes human gipa-drug test ang 314 ka mga empleyado sa lungsod.

Matud ni Meca nga ang maong drug test gihimo tungod sa hangyo sa mga local chief executives.

Karong bulan sa Agosto aduna pay pito ka mga lungsod ang gikatakda nga ipaubos sa drug test subay gihapon sa request sa mga mayor.

Gitinguha usab karon sa CPADAO nga mapasar sa provincial board ang drug-free workplace program ug authorized drug testing policy aron nga ma- standardized ang pagpahigayon og drug testing ug ang paglatid sa mamahimong silot niadtong mga masakpan. (BANAT NEWS)