Monitoron ang uwan
CEBU, Philippines - Mas gipa-uswag sa dakbayan sa Lapu-Lapu ang pag-monitor sa uwan pinaagi sa paggamit og Automated Weather System aron masukod ang gidaghanon sa tubig-uwan.
Nagkanayon si Mayor Paz Radaza nga mao kini ang gamiton aron sa pagpadala og mensahe o advisory sa mga kabarangayan nga posibleng maapektuhan og baha.
Ang mga lugar nga bahaon mao ang Brgy. Bankal, Buaya, Ibo, Maribago, Canjulao, Pajo ug Gun-ob. Samtang nahimutang ang gihisgutang Automated Weather System sa Lapu-Lapu City Hall ug matud ni Andy Berame ang Deputy Officer sa City Disaster Risk Reduction Management Office nga importante nga maka-hatag og advisory ang siyudad nga gikan sa PAGASA aron ma-alerto ang mga barangay ug makapangandam sila dayon.
Sa pagkakaron, padayon gihapon ang siyudad nga makapangita og solusyon sa baha ilabi na nga panahon na usab sa ting-uwan.
Midugang usab si Berame nga ang mga kabarangayan sa siyudad adunay mga trained disaster-response team nga responsable sa pag-responde sa baha ilabi na sa mga nagkalain-laing natural nga kalamidad.
Awhag sa kagamhanan ngadto sa mga residente nga dili magpataka og labay sa basura sa mga kanal aron dili kini mobara ug aron usab walay baha. (BANAT NEWS)
- Latest