Tungod sa hubog, duha patay
CEBU, Philippines - Duha ang patay ug usa ang angol sa disgrasya sa kadalanan sa Sitio Lagang, Ocaña, Dakbayan sa Carcar sa niaging adlaw.
Ang nangamatay mao sila si Rogelio Nelmida, 55, taga Barangay Napo, nagmaneho sa Mazda nga may plate number 090803 ug usa ka hubog nga naila nga si Dioscoro Aliser, hingkod ang pangedaron.
Samtang ang naangol naila nga si Maria Luz Nelmida, hingkod ang pangedaron.
Ang nakadasmag nga maoy nakapatay sa mga biktima mao si Jesus Ybañez, 55, taga Barangay Mojon, Dakbayan sa Talisay ug driver sa Montero nga may plate number YKP-795.
Matud ni Police Officer 1 Regie Amad sa Carcar City Police Station nga nagsubay sila si Nelmida ug Ybañez sa managlahi nga direksiyon apan nilikay si Ybañez sa hubog nga si Aliser kinsa nagwandog-wandog naglakaw sa dalan ug iya pa gayud nahapit ug napunggit.
Sumala pa ni Amad nga human nadam-agi ni Ybañez si Aliser nilahos ang sakyanan sa pikas linya nga nibangga sa gimaneho ni Nelmida hinungdan sa grabeng kadaut nga nahiaguman niini ug maoy naingnan sa iyang kamatayon samtang nalandig sa tambalanan ang asawa.
Gibutyag ni Amad nga si Ybañez nagagikan sa Argao ug padulong na unta sa Talisay samtang si Nelmida gikan sa Dakbayan sa Lapu-Lapu ug padulong na unta kining mouli sa Napo dihang nahitabo ang aksidente.
Si Amad nibutyag nga kasamtangan una nilang gitanggong sa karsel sa Carcar City Police Station si Ybañez ug gipaabot ang pagpasaka sa tukma nga kaso nga kalapasan sa reckless imprudence resulting to multiple homicide, physical injuries and damage to property. (BANAT NEWS)
- Latest