Namalit og botos nakaipsot

CEBU, Philippines - Narekober gikan sa mga lalaki nga gituohang namalit og botos sa Tapon, Lungsod sa Dumanjug ang mga kwarta ug election paraphernalia pasado alas 2 sa nakalabay nga hapon.

Ang mga sakop sa Dumanjug Police nga gipangulohan ni Police Insp. Rogelio Amoroso Jr, nisubay sa maong dapit labot sa gikatahong vote buying.

Dihang paingon pa lang ang mga polis, abtik nga nakabantay ang duha ka lalaki ug nisutoy og dagan.

Apan nahabilin ang usa ka green eco bag nga dunay mga election paraphernalia nga may pangan sa tulo ka kandidato sa pagka-konsehal ug bise mayor ubos sa 1Cebu Party.

Sulod sa bag nakita sa mga polis ang 20 ka tag P100 ug 23 ka P20 nga kantidad tanan og P2,460. Samtang gipasabot ni Senior Supt. Clifford Gairanod, direktor sa Cebu Provincial Police Office, nga iyang ipaimbestigar ang maong kaso.

Matud ni Gairanod nga ang hugot nga seguridad nga gipatuman wala nagtumong lang sa usa ka partido kun dili target nila kadtong mga goons sa mga politiko ug sa mga tawo nga magdala og armas.

Panawagan niya sa katawhan nga pahibaw-on dayon ang mga polis kung makamatikod nga dunay pagpamalit og botos sa ilang dapit aron ma-aksiyonan sa mga polis.

Samtang gipangandaman sa CPPO ang dali nga pagresponde kung may kaguliyang nga mahitabo atol ug human sa eleksiyon karong Lunes. Matud ni Gairanod nga duna na silay crowd dispersal management (CDM) diin ang mga sakop sa Regional Public Safety Battalion ang gipaubos sa training. (BANAT NEWS)