DJ nga driver, pusher pa

CEBU, Philippines - Nasikop sa Regional Anti-Illegal Drugs Special Operations Task Group-7 ang disc jockey (DJ) sa disco mobile ug usa ka gidudahang pusher sa buy-bust operation pasado alas 5 sa niagi’ng hapon sa Poblacion III, Carcar City.

Ang nasikop naila nga sila si Tereso Bacon ug John Mark Bolasco, nga usa ka DJ apan mo-sideline isip habal-habal drayber, ug gitudlo sa kapolisan isip level two drug pusher.

Si Senior Inspector Joey Bicoy sa RAIDSOTG-7 niingon nga target sa ila’ng operasyon ang duha ka suspetsado’ng drug pushers human nahibaw-an ang ila’ng kalihukan.

Matud niya nga napalitan nila si Bacon og usa ka gamay nga pakete nga shabu ug didto nipahibawo na sila nga mga polis sila ug gidakop dayon nila si Bacon.

Si Bolasco nga nakabantay nikaratil og dagan ug gigukod siya sa mga operatiba ug wala’y swerte kay nadagma ug nagunitan sa kapolisan.

Nakuhaan ang duha og lima ka daku nga putos sa  shabu, 29 ka gamay nga putos nga mokabat og kapin sa P350 mil; buy-bust money ug P1,300 nga cash. Si Bacon nga nahinabi sa Banat News niangkon nga siya naninda tungod sa kalisud samtang si Bolasco niingon nga nadala lang siya kay gibinlan siya og “item” sa usa ka tawo nga ipabaligya niya.

Sumala pa niya nga wala gyud unta siya’y plano nga mamaligya apan natintal lang siya sa tanto niya nga pagmaneho og habal-habal. (BANAT NEWS)