Kapatas gipusil patay

CEBU, Philippines - Patay ang usa ka 54- anyos nga kapatas human kini gipusil sa wala pa mailhi nga gunman diha sa V. Rama Ave., Sitio English, Barangay Guadalupe, Cebu City.

Ang biktima naila nga si Francisco Caban Amaya, alyas Frankie, nagpuyo sa maong lugar.

Sa imbestigasyon sa Homicide Section sa Cebu City Police Office nga gipangulohan ni SPO4 Rey Cuyos, naglingkod ang biktima duol sa kapilya dihang kalit kining gipusil sa tulo ka wa mailhing tawo.

Ang tulo ka mga lalaki giingong nagsige’g balik-balik sa maong lugar ug daw sa dunay gipangita. Nagduda ang kapulisan nga nasaypan ang biktima.

Human sa pagpamusil yano ra nga nanglakaw ang tulo ka mga lalaki ug pag-abot sa unahan nanakay sila og taksi.

Ang biktima naigo sa ulo ug kilid nga maoy hinungdan sa iyang kamatayon. (Jojo C. Ugdol/EIM)(BANAT NEWS)