P350mil drugas nasakmit

CEBU, Philippines – Usa ka joint operation ang gihimo sa Regional Anti-Illegal Drugs Special Operation Task Group (RAIDSOTG7), Cebu Provincial Police Office (CPPO) ug Carcar Police, diin ilang nasikop ang usa ka level two drug pusher sa Sitio Lagtang, Bolinawan, Carcar City, kagahapon sa buntag.

Ang pagronda gihimo pinasikad sa search warrant nga gi-isyu ni Regional Trial Court (RTC) Judge Wilfredo Navarro sa Branch 19 sa dakbayan sa Sugbo batok ni Romil Lanit Velez, 46.

Ang grupo ni Inspector Joey Bicoy nakakuha og mobalor sa P354 mil nga kantidad sa shabu, duha ka timbangan, drug paraphernalia ug cash nga P3,000.

Ang suspek nagdumili paghatag sa iyang habig dihang gipangutana sa Banat News bahin sa alegasyon kaniya.

Samtang pasakaan og kaso karong adlawa sa National Bureau of Investigation (NBI)-7 ang 29 ka mga lalaking nadakpan, lakip ang usa ka giingong city hall employee nga giingong nag-operate og “shabu tiange” diha sa Barangay Ermita, Cebu City.

Si Regional Director Max Salvador ug ang agent on case special investigator Larry Dominguez nagkanayon nga dugay na nilang gipanid-an ang maong “shabu tiange” nga gipadagan ni Rodelito Gabije nga gihulagway nga “untouchable” sa lugar nga 30 metros lang gikan sa barangay hall.

Ang mga dinakpan ipa-drug test ug ang mapositibo mao ray pasakaan og kaso.

Samtang nasagmuyo si Ermita Barangay Captain Felicisimo Rupinta human gipasanginlang wa mo-cooperate sa NBI. Matud niya nagpadala siya og duha ka tanod aron mo-witness sa maong operasyon.

Kahinumdoman nga sa uwahing surprise drug test sa mga kawani sa barangay, onse ka barangay tanod ug duha ka barangay workers ang adik. - /EIM) (BANAT NEWS)