Sadiq (91)
“PERO bago natin simulan ang negosyong ito, gusto kong dumalo sa seminar. Maraming libreng seminar para sa mga nagnanais magnegosyo. Marami akong mapupulot na tips sa mga seminar,” sabi ni Sadiq kay Gina.
“Tama ang naisip mo, Daddy. Meron akong kasamahan dati sa trabaho na ganyan din ang ginawa. Nag-attend siya ng mga seminar at mga training sa papasuking negosyo at alam mo, ang huli kong balita, mayaman na siya. Nasa isang resort ang kanyang business. Mabentang-mabenta sa tourist.’’
“Wow, tama pala ang naiisip ko.’’
“Oo, mahalaga na bago pumasok sa anumang negosyo ay mayroong kaalaman. Kaya marami ang nabibigo o bumabagsak ang negosyo ay dahil walang kaalaman sa pinasok. Merong gaya-gaya lang.’’
“Palagay ko, magtatagumpay tayo sa naisip kong negosyo.’’
“Basta pinag-aaralang mabuti at may magandang plano at saka nasa puso ang pinasok na negosyo, magtatagumpay.’’
“Next week, dadalo na ako sa mga seminar. Meron na akong alam at libre lang. Kaya lang….’’
“Kaya lang ay ano, Daddy?’’
“Sino ang sasama sa chemo therapy mo. Hindi kita hahayaang mag-isa.’’
“O e di ibang araw na lang ang chemo session, puwede naman yun di ba? O mas mabuti e itanong natin kay Dok.’’
“Okey sige.’’
“Makakapag-adjust naman ang gamutan sa akin kaya huwag mong problemahin yun.’’
Ganun nga ang ginawa nila kaya nakadalo sa libreng seminar si Sadiq. Marami siyang nalaman ukol sa balak na negosyo.
Ilan pang seminar ang kanyang nadaluhan na lalo pang nagdagdag sa kanyang kaalaman.
Sapat na iyon para ituloy ang negosyo.
Makalipas ang isang buwan, ipinagawa na niya ang food stall sa isang pinto ng kanilang paupahang apartment.
Habang ginagawa, marami siyang magandang iniisip sa nalalapit na negosyo.
(Itutuloy)
- Latest