ALAKDAN(164)

NARAMDAMAN ni Troy na lumalabas na ng banyo si Mama Mayette kaya dali-dali niyang ibinulsa ang diary ni Kreamy at pati na picture. Nagmamadali siyang lumabas at isinara ang kuwarto. Nagbalik siya sa kinapapatungan ng bag ni Mama Mayette at inilagay sa loob niyon ang susi. Tinandaan niya ang number ng susi.

Nagbalik siya sa salas at kunwari ay nagbabasa ng magazine. Nakabihis na si Mama Mayette nang magtungo sa salas.

“Anong gusto mong kainin, Troy?’’

‘‘Kahit ano?’’

“Magpadeliber tayo ng pagkain. Marami.’’

“Bakit, birthday mo?’’

“Hindi!’’

“Ba’t ka magpapadeliber nang maraming pagkain?’’

“Wala lang. Natutuwa lang ako.’’

Napailing-iling si Troy.

“Gusto mo lechon?’’

“Sige. Kung ano ang gusto mo, gusto ko na rin.’’

“Kaya lang baka may HB ka e bawal ang lechon sa’yo…’’

“High blood? Wala naman akong high blood.’’

“E di ba sumasakit ang ulo mo? Baka HB ka nga. Huwag na lang litson. Mahirap na. Baka kung ano ang mangyari sa’yo e iwan mo agad ako.’’

“Takot kang mamatay ako.’’

“Siyempre naman ano?’’

“E di humanap ka uli ng iba.’’

“Ay naku Troy, wala kang kapalit.’’

Napailing-iling si Troy.

“Hindi ka naniniwala?’’

“Malay ko kung palitan mo agad ako.’’

“Hindi kita papalitan Troy.’’

“Salamat naman.’’

“Baka nga mauna pa ako sa’yo, Troy.’’

‘‘Huwag naman at baka malungkot ako.’’

“Malulungkot ka tala-ga kapag natigok ako o masisiyahan ka, Troy?’’

“Malulungkot siyempre.”

“Hayaan mo at kapag natigok ako, ipapamamana ko sa’yo lahat nang kayamanan ko.’’

Napangiti si Troy.

“Salamat.’’

“Ano nga pala ang hihilingin mo sa akin, Troy ?

Sige sabihin mo na. Huwag ka nang mahiiya.’’

‘‘Gusto kong mag-aral sa kolehiyo. Pag-aralin mo ako, Mayette.’’

(Itutuloy)