Ninong (ika-110 na labas)
“ALAM mo bang patay na si Diana, Ninong?” tanong ni Jigo. Hindi ako makatingin sa kanya nang deretso.
Umiling lamang ako. Pinaninindigan ko nang magsinungaling na walang nalalaman sa kanyang asawa. Nagkunwari akong inosente. Kung hindi ganito ang gagawin ko, baka masama ang kahantungan ko. May mga bagay na dapat ding ilihim.
“Pinatay siya sa kanyang condo, Ninong. Pagkatapos patayin, sinunog ang katawan.”
Napailing-iling ako kunwari.
“Galit na galit ang gumawa, Jigo?”
“Oo.”
“Meron nang suspek sa pagpatay?”
“Wala Ninong. Maski nang umalis ako patungo rito, wala pang makitang lead ang pulisya.”
Naalala ko ang sinabi ng kasamahan sa opisina ni Diana. Wala nga raw makitang ebidensiya ang mga pulis kaya hirap na hirap tukuyin ang suspek.
“Sinunog kasi ang mga ebidensiya, Ninong. At pati nga mukha ni Diana hindi na makilala dahil nasunog.”
Napa-tsk-tsk-tsk ako.
“Palagay ko hindi na masosolb ang kaso ano Jigo?”
“Siguro nga Ninong…”
Hinihintay kong sabihin ni Jigo ang “lihim” niya pero nanatili lamang na tahimik.
“A-anong lihim ang sinasabi mo Jigo? Me kaugnayan ba sa pagkamatay ni Diana?”
Saka pa lamang tila natauhan si Jigo.
“Oo Ninong. Sana tayong dalawa na lang ang makaalam nito. Kaya mo ba Ninong?”
“Ano ba iyon?”
“Ako ang nagpapatay kay Diana!”
Gimbal ako. Ang taong ito na parang hindi makabasag ng pinggan ang nagpapatay sa asawa?
“Kung ikaw ang nasa kalagayan ko Ninong, ano ang gagawin mo? Lalo na kung makita mo ang iyong asawa na may nakapatong na iba?”
Hindi ako makasagot. Paano nga ba?
“Maraming beses kong tinanong ang sarili Ninong. Dapat ko bang gawin ang balak na iyon? Pero nanaig sa akin na paghigantihan ang taksil na babae…”
“Sino ang gumawa?”
“Mamamatay-tao na labas masok sa city jail. Madali lang kapag me pera, Ninong. Ni hindi ko nga naubos ang perang nakuha ko sa ATM at bag ni Diana… me sobra pa.”
Hindi ako makapagsalita. Ang pera rin palang galing sa akin ang gagamitin sa taksil na babae.
Ayaw ko na sanang pakinggan pa ang mga karugtong ng kuwento sa kamatayan ni Diana pero patuloy si Jigo. Gustong ilabas lahat ang sukal sa dibdib. Lahat na ay gustong isiwalat.
(Itutuloy)
- Latest
- Trending