Mas importante sa kuwarta

Kinakusgan nga rason sa administrasyon ni Presidente Ferdinand Marcos Jr. sa pag-isnab sa sibaw nga mga awhag sa pagbadlong na sa Philippine Offshore Gaming Operators (POGO) mao ang argumento sa Philippine Amusement and Gaming Corp. (PAGCOR): Makulban sa kaldero ang 68,000 ka Pilipino nga nagtrabaho sa industriya.

May sukaranan nga mangugat ang PAGCOR. Kay 68,000 tinuod ka pamilya ang gutumon kon palayason ang POGO sa labing dali nga panahon. Pero ang mga numero sa PAGCOR, sa di pa iwara-wara sa Malacañang, angay nga itapad sa uban nga makahasol nga kasayuran.

* * *

Ang Department of Labor and Employment (DOLE) nitaho nga kapin ra sa 20,000 ang rehistrado nga Pilipino nga mga trabahante sa POGO. Ang Bureau of Internal Revenue (BIR) nipahibawo og mas gamay nga numero sa mga nakabayad og income tax.

Nganong dako man kaayo ang kang-a sa kasayuran nga gihatag sa nagkalainlain nga mga ahensiya sa nasudnong gobyerno? Gipaburot ba sa PAGCOR ang ilang numero aron mas kaduphan ang ilang panguwarta? O tinuod ang mga pagduda nga kasagaran sa mga POGO wa marehistro ug wa magbayad og saktong buhis?

* * *

Mas makahasol ang sumbong sa Pilipino ug langyaw nga mga trabahante nga naluwas sa kapolisan gikan sa POGO hubs nga ilang gironda sa niaging mga buwan:

•             Gipugos sila pag-apil sa scamming operations ug dihang wa kaabot sa quota sa gidaghanon sa nailad ug kuwartang nakilkil, gikulata ug wa pakan-a; ug

•             Batan-ong mga babaye gisaaran og maayong trabaho ug dakong suweldo pero gilawog diay sa prostitusyon ug gipapilian sa mga kustomer samtang gipalumbay sud sa higante nga bildo nga halwa.

* * *

Nakapait mao nga ang PAGCOR ug Malacañang, imbes mangayo og pasaylo sa makaluluoy nga mga biktima nga nalutsan sila sa kolorum nga POGO ug langyaw nga mga sindikato, nanghunaw og responsibilidad ug niinsistir nga dako gihapon og tabang ang industriya sa nasudnong ekonomiya.

Ambot nasultihan ba sa ilang mga ginikanan ang kadagkoan sa PAGCOR ug sa Malacañang nga dunay mga butang nga mas importante kay sa kuwarta. Sama sa tawhanong mga katungod, kagawasan gikan panaugdaog ug panamastamas, katungod nga mahaw-as gikan sa pagpahimus ug nasudnong kaligdong ug kadungganan.