Nasikwate sa SOCE
Mapugos ba si Presidente Ferdinand Marcos Jr. sa pagbakante sa labing taas nga puwesto sa gobyerno kon mapamatud-an nga sayop ang State Of Contributions and Expenditures (SOCE) nga iyang gisumiter sa Commission on Elections (Comelec) human sa eleksiyon sa 2022?
Kana kon may mangahas sa pag-imbestigar sa dakong kalainan sa lista sa iyang donors nga gipublikar sa Comelec niadtong Agosto 2022 ug sa mga ngan nga labing dagko og amot (“they practically bankrolled our election”) nga gibisto ni First Lady Liza Araneta Marcos sa iyang pagpa-interview sa niaging semana.
***
Makahatag nato og ideya unsay posibleng mahitabo ang kontrobersiya niadtong 2013. Kanus-a gisugo sa Comelec nga mokanaog sa ilang puwesto ang 422 ka mga opisyal nga nidaog sa eleksiyon pero wa kasumiter og sakto nga SOCE. Nga naglakip sa upat ka gobernador, 20 ka kongresista, 24 ka mayor, usa ka bise gobernador, 12 ka provincial board members, 26 ka city ug municipal vice mayors, ug 324 city ug municipal councilors.
Samtang di sama kataas sa kang Marcos ang ilang puwesto, apil sa gipakanaog sa puwesto ang inilang mga politiko: Gloria Macapagal Arroyo sa Pampanga, Vilma Santos sa Batangas, ug anhing Rodolfo Biazon sa Muntinlupa.
***
Pagmatuod nga way gipasaylo ang Comelec, naigo ang mga sakop sa higanteng mga partido: 169 sa Liberal Party ni Noynoy Aquino, 44 sa National Unity Party ni Enrique Razon, 39 sa Nacionalista Party ni Manny Villar, 31 sa Nationalist People's Coalition ni Ramon Ang, 29 sa United Nationalist Alliance ni Jojo Binay, ug 17 sa Lakas-CMD ni Arroyo.
Apil sa gitangtang ang 155 nga wa mo-file og SOCE ug 269 nga depektuso og SOCE.
***
Sa di pa mag-piyesta ang mga Duterte kay makapuli na si Bise Presidente Sara Duterte Carpio kon taktakon sa Comelec si Marcos, kay wa ilista sa SOCE ang giila sa iyang asawa nga kinadak-an nilang donors nga si Martin Araneta ug Michael Ma, maayong susihon ang ending sa kontrobersiya sa 2013.
Kasagaran sa 422 ka gipalagpot nga mga opisyal nakabalik sa puwesto. Kay nalangay pag-abot sa Comelec ang ilang SOCE ug nakurhian ang kasaypanan. Gawas pa, kanhi abogado ni Marcos ang iyang tinudlo nga si Comelec Chairman George Garcia.
- Latest
![](https://www.philstar.com/images/stand-in-photo-male.jpg)
![](https://www.philstar.com/images/stand-in-photo-male.jpg)