2,092 ka adlaw ang nahibilin
Kay di man mohatag og accomplishment report sa iyang unang 100 ka adlaw sa puwesto ang nagtungkawo karon sa Malacañang nga si Presidente Ferdinand Marcos Jr., palihug subaya ning lista (di kong kabasol nimo kon bation og higante nga kahaw-ang ug kamingaw) sa pipila lang sa mga nahimo sa unang 100 ka adlaw sa pamunoan ni anhing Presidente Noynoy Aquino niadtong 2010:
- Nilig-on ang peso ug nilambo ang foreign reserves ug stock market tungod sa kadasig sa pagtukod ug pagpalapad sa mga negosyo;
- Nibubo ang langyawng mga negosyante og $2.4 bilyones (?141 bilyones) nga puhonan ug nimugna og 43,600 ka trabaho;
***
- Tungod sa agresibong kampanya sa BIR, gitangtang sa Organization for Economic Cooperation and Development (OECD) ang Pilipinas gikan sa listahan sa mga nasud nga tigtago sa tax evaders;
- Gilusad ang Public-Private Partnerships nga nakapabarug sa higanteng mga proyekto sama sa passenger terminal sa Mactan Cebu International Airport ug sa Cebu-Cordova Link Expressway;
- Gi-umintohan ang budget sa DepEd gikan sa ?175 bilyones ngadto sa ?207.3 bilyones aron matukod ang 13,147 ka classrooms ug ma-hire ang 10,000 ka magtutudlo;
***
- Gi-umintohan and budget sa DOH gikan sa ?29.3 bilyones ngadto sa ?33.3 bilyones;
- Gi-umintohan ang budget sa DSWD gikan sa ?15.4 bilyones ngadto sa ?34.3 bilyones aron pagdoble sa natabangan sa Conditional Cash Transfer Program gikan sa usa ka milyon ka pamilya sa 2010 ngadto sa 2.3 milyones ka pamilya sa 2011;
- Nasalbar ang dul-an ?50 bilyones nga buhis sa katawhan pinaagi sa pagkanselar sa anomalusong mga proyekto sa DND (?3.6B), DOTC (?1B), NAIA (?43.5B), DPWH (?934.1M), ug DA (?30M);
***
- Na-realign ang ?11 bilyones gikan sa way kapuslanang mga proyekto ngadto sa mas dinaliang programa pinaagi sa zero-based budgeting;
- Ang forecasts sa PAGASA nahimong mas detalyado (ginganlan nang mga lugar nga uwanon ug unsang orasa) ug mas subsob (imbes tag-walo ka oras, inoras nang bulletins sa mga bagyo); ug
- Nahapsay sa administrasyon ang kaliboan ug usa ka kahasol sa burukrasya nga wa masulbad sa nasundang administrasyon sud sa 3,448 ka adlaw (siyam ka tuig ug upat ka buwan).
- Latest
