Mas bida gihapong facemask

Makahasol ang duha ka pagtuon nga pulos nagpasidaan sa kaseryuso sa hulga sa COVID-19 bisan sa mga nasud nga nakabuylo na sa pagpamakuna:

• Ang unang pagtuon sa gobyerno sa Estados Unidos nagbutyag nga ang mga nabakunahan, bisan di na magrabehan, matakdan ug makatakod gihapon sa ubang mga tawo; ug

• Ang ikaduhang pagtuon sa gobyerno sa Britanya niangkon na nga ang COVID-19 di mapapas ug ang kagaw padayong mausab ug may kahigayonan nga mahimong mas bangis nga di na masagang sa mga bakuna nga gigamit na karon sa kanasuran sa kalibotan.

 * * *

Ang unang pagtuon sa Centers for Disease Control and Prevention (CDC) sa Estados Unidos maoy hinungdan nganong gibalik ang lagda nga mag-facemask ang mga Amerikanhon kon naa sa sud sa buildings.

Naalarma ang CDC nga samtang epektibo ang mga bakuna batok sa Delta virant, may pipila sa fully-vaccinated nga natakdan. Bisan wa mograbe ang ilang kahimtang tungod sa proteksiyon sa bakuna nakaangkon sila og samang viral load sa Delta, nga kapin libo pil-a sa unang mutations sa COVID-19. Maong dako ang kahigayonan nga makatakod gihapon sila sa uban.

 * * *

Ang ikaduhang pagtuon sa Scientific Advisory Group for Emergencies (SAGE) sa United Kingdom mas makapaluya ang resulta:

• Mas lisod na og apas ang pagpamakuna sa mas paspas nga tinakdanay sa tibuok kalibotan maong magpabilin nga hulga ang COVID-19 sa umaabot nga katuigan; ug

• Samtang magkadugay ang tinakdanay, makabuylo ang kagaw sa pag-usab sa iyang kaugalingon ug mahimong makamugna og bag-ong variant nga di na masagang sa mga bakuna karon.

 * * *

May gamay hinuon nga saad sa paglaom nga malili sa duha ka pagtuon: Ang facemask nagpabilin nga epektibo, ug gani napamatud-an nga mas epektibo kay sa tanang bakuna nga namugna ug gigamit na, batok sa COVID-19.

Tingali ang gikinahanglan maong paglugway sa atong pailob. Padayon tang mag-facemask ug physical distancing samtang makabuylo nang pagpamakuna sa Pilipinas ug ubang mas kabos nga mga nasud. Hangtod nga makab-ot nang gipangandoy nga herd immunity --pagbakuna sa 70% ngadto sa 85% sa populasyon-- kanus-a wa nay katakdan ang Delta ug uban pang umaabot nga variants. Ug wa na lay kapaingnan gawas sa hingpit nang pagkapapas.