Pag-ilog sa atong trabaho
ARANGKADA - Leo Lastimosa (The Freeman) - July 2, 2019 - 12:00am

Sa kasibaw sa mga reklamo sa mga Sugbuanon nga nagkadaghan ang mga trabahante nga taga China nga ilang nakit-an sa construction projects sa mga dakbayan ug kalungsoran sa Metro Cebu, way bisan usa ka buhatan sa lokal ug nasudnong gobyerno ang nagpakabana.

May pipila na ka ronda nga nakadakop og illegal nga Chinese workers sa Metro Manila ug ubang bahin sa Luzon apan wa pa tay nadunggan nga ronda, labaw nang wa pay nadakpan, sa Department of Labor and Employment (DOLE) ug Bureau of Immigration (BI) dinhi sa ato.

***

Di ikahibung ang panagana sa DOLE, BI, ug ubang buhatan sa gobyerno sa pagsusi sa mga pasangil sa ilegal nga pagpanrabaho sa Chinese workers. Kay nagkasungi ang mga mensahe nga ilang nakuha gikan sa nasudnong liderato:

• Sa usa ka bahin, nipasidaan ang DOLE ug BI nga dakpon ug palayason ang langyawng mga trabahante nga way working permits; apan

• Sa pikas nga bahin, nipahimatngon si Presidente Rodrigo Duterte nga di angayng apikihon ang ilegal nga Chinese workers kay peligro nga bawosan sa China ang Pilipinhon nga mga trabahante sa mainland China.

***

Ang gidangatan sa Pilipinhong mga mangingisda kansang barko gibanggaan ug gibiyaan sa barko sa China sa kalaworan sa Recto Bank, nga nahimutang sud sa Exclusive Economic Zone ug busa kabahin sa atong nasudnong teritoryo, maoy labing bag-ong pasidaan unsay dangatan ni bisan kinsang mangahas pagtulisok sa taga China.

Gawas nga wa tuohi ang ilang pangangkon, gibarikadahan og daghang polis, gipasanginlan nga nagpagamit sa politika ug gitunolan lang og hinabang human nibakwi sa ilang pasangil.

***

Ubos sa mga lagda sa DOLE, ang dul-an sa upat ka milyon ka turista gikan sa China makahimo pag-usab sa ilang tourist visas ngadto sa working visas. Wa hinuoy kasayuran ang DOLE pila nila ang nituman sa proseso ug pila ang nidiretso sa pagtrabaho sa way pananghid.

Ubos sa atong mga balaod, ang Pilipinhong mga mamumuo maoy unang hatagan sa kahigayonan sa trabaho, tugotan lang ang mga langyaw sa mga trabaho nga way Pilipinhon nga makamao. Kamao ang mga Pilipinhon sa konstruksiyon. Nganong gihatag man sa mga langyaw? Mas lisod ning ipasabot sa 3.8 milyones ka Pilipinhon nga way trabaho.

leo_lastimosa@abs-cbn.com

CONSTRUCTION
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with