Mangopya na lang ni Binay
Ug nagpadayon ang nag-usab-usab nga panagang ni Davao City Mayor Rodrigo Duterte sa pasangil sa gitago niya nga dakong katigayonan sa mga bangko. Human siya niuyon niadtong Biyernes nga ablihan ang iyang account sa Bank of the Philippine Islands (BPI) branch sa Julia Vargas Avenue sa Pasig City karong adlawa, Lunes, nipahamtang na og kundisyon niadtong weekend.
Laksot nang daan alang sa nagpailang isog ug way gikahadlokan nga magpabilin sa Davao City ug igo lang mopada og abogado pakig-atubang ni Senador Antonio Trillanes IV, mas ngil-ad ang pagbakwi sa pasalig nga ipakita sa publiko ang iyang mga transaksiyon sa BPI aron pagmatuod nga bakak ug pamolitika ang pasangil ni Trillanes.
* * *
Nganong nagkasungi man ang mga sulti nilang Duterte, sa iyang mga tigpamaba ug sa kadagkoan sa iyang partido, ang PDP-Laban? Nabalaka na ba nga makadaot ni Duterte ang pag-abli sa iyang bank accounts? Bahala na kon gisulti ning Duterte sa ikaduhang presidential debate nga gipahigayon dinhi sa Sugbo ug nipirma gyod gani silang Senador Alan Peter Cayetano og waiver sa ilang bank accounts sa Tacloban City niadtong Marso.
Nitumaw ang samang panagsungi atol sa pagtumaw sa rape joke ni Duterte sa niaging buwan. Giawhag si Duterte sa iyang mga magtatambag pagpangayo og pasaylo, kusganong nibalibad si Duterte, nangayo og pasaylo alang niya ang PDP-Laban, aron lang ipanghimakak ni Duterte.
* * *
Samtang wa pay klaro maablihan ba gyong bank account ni Duterte, abunda nang mga panagang sa iyang kampo:
•Ang PDP-Laban niisa na sa posibilidad nga ang minilyon ka pesos sa bank account ni Duterte mahimong hinabang alang sa mga biktima sa katalagman;
•Pipila ka dumadapig nisugyot sa kahigayonan nga mga kaatbang sa politika ni Duterte ang nag-abli sa bank account aron lang pag-apiki niya; ug
•Ubang mga dumadapig nipadayag og pagduda nga kang Duterte ang account apan gisudlan og dagkong kuwarta sa iyang mga kaatbang nga wa mahibaw-i ni Duterte kay wa mabatasan ang pagsige og susi pila nay iyang kuwarta sa bangko.
* * *
May mga dumadapig si Duterte nga hingpit nga nisalig sa iyang kaligdong ug niawhag sa pag-abli sa iyang bank accounts, inay mosunod sa pa-goryo-goryo ni Bise Presidente Jejomar Binay, aron mahilom silang Trillanes ug ubang politiko nga nisakay sa mga pasangil sa ilegal niyang katigayonan.
Apan may mga niinsistir nga ang pag-abli sa accounts maoy pagtukob sa laang ni Trillanes. Maong bahala na kon mangopya silang Binay. Kay kapin sa tuig ang imbestigasyon sa Senado una nitiurok ang ratings ni Binay. Usa ka semana na lang sa di pang piniliay. Wa nay mahimong imbestigasyon sa Senado. Mahimong magtungkawo na si Duterte sa Malakanyang una makahipos ang mga kaatbang og dugang mga ebidensiya batok niya.
- Latest
