Saad ni Pacman
CEBU, Philippines - Mibiya siya nga kampiyon ug mobalik siya nga usa gihapon ka kampiyon.
Mao kini ang saad ni Pinoy ring star Manny Pacquiao sa umaabot niyang pagdepensa sa iyang WBO welterweight title batok ni Jeff Horn karon nang Domingo (oras dinhi sa Pilipinas) didto sa Suncorp Stadium sa Brisbane, Australia.
Sukwahi sa panahom sa uban, si Pacquiao nagkanayon nga giseryoso niya og maayo si Horn ug bisan siya maoy inilog, dili mahitabo nga mokompiyansa siya bisan gamay gumikan kay wala siya’y plano nga mailogan og bakus sa iyang pagpanulong didto sa teritoryo sa iyang kontra.
Midugang ang eight-division world champion nga sukad-masukad sa iyang karera, karon pa siya gibati og tumang kadasig nga modaog sa usa ka away.
Wala hinuon mohatag og garantiya si Pacquiao sa dihang gisukna kun unsa kataas ang posibilidad nga iyang ma-knockout si Horn, nga bisan tuod og wa’y pilde wala pa kaayo mailhi sa kalibotan sa boksing.
“A knockout is a bonus of hard work,” matud ni Pacquiao nga katapusang midaog pinaagi sa KO niadto pang 2009 batok ni Miguel Cotto.
Dungan niini, si Pacquiao naglantaw sa usa ka malisud nga away batok ni Horn nga iyang gihulagway nga usa ka lig-ong kontra. (BANAT NEWS)
- Latest
