Anak ni Dimples, flight instructor sa Australia

CEBU, Philippines — Puwerting lipaya sa aktres nga si Dimples Romana gumikan sa laing kalamposan nga nakab-ot sa iyang anak nga si Callie.

Gikatahong usa na ka certified flight instructor si Callie sa usa aviation school sa Australia.

Kahinumdoman nga niadtong 2024,  usa na ka licensed commercial pilot si Callie.

Dolly, Liza ug Lea ,nagpanikad  na  sa “Forgotten Island”

Pipila ka mga  Pinoy  ang mahimong kabahin sa  bag-ong  animated feature nga  “Forgotten Island” sa  DreamWorks Animation.

Malakip sa maong proyekto ang award-winning actress  nga si Dolly de Leon, Filipino-American comedy king Jo Koy, Lea Salonga  ug  ang aktres nga si  Liza Soberano.

Pasok usab sa  voice cast sila Amielynn Abellera, Malaysian actor Ronny Chieng,  H.E.R., Dave Franco, Manny Jacinto, ug  Jenny Slate.

Naghinam-hinam na  sa maong proyekto ang nahisgotan nga mga artista .

AshDres, dili buwagon

Gipasalig sa Big  Boss  sa Viva Entertainment nga si Vic del Rosario nga dili buwagon ang  AshDres loveteam nila Andres Muhlach ug  Ashtine Olviga ilabi na nga nagbaha gihapon ang fans niini.

Nagmaya og maayo ang fans sa AshDres sa gisulti sa dakong opisyal sa Viva .

Kahinumdoman nga nahulma kaniadto  ang loveteam nila  Andres ug Ashtine pinaagi sa nagmalampuson nga Viva One series  nga  Mutya ng Section E.

Shawie bida sa Kapuso-Kapamilya series?

Gidungog nga usa si  Sharon Cuneta sa mga  bida sa pagahimoon nga  teleserye nga koloborasyon sa  GMA-7 ug ABS-CBN. Gikatahong gisugdan na ang mga negosasyon sa maong proyekto .

Dream car

Napalit na gyud ni Will Ashley ang gipangandoy niya nga sakyanan ug giingong nagkantidad kini og P4.8 million . Nagbaha Ang showbiz projects ni Will sukad siya nahimong kabahin kaniadto sa Pinoy Big Brother .

Makahuwat ra

Wala ra gyu'y problema si Vina Morales sa iyang pagka- single . Bisan pa man sa iyang pangandoy nga makabaton og bag-ong love life , nitoo siya sa panultion nga maabot ra gyud  ang saktong panahon alang sa maong butang.

“Gamechangers” magsugod karong Marso 25

Ipakita sa iWant ang talagsaong talento ug garbo sa mga Pinoy  pinaagi sa bag-ong limited series nga “Gamechangers,” nga magsugod na  karong Miyerkules, Marso 25, alas-8 sa gabii.

Ang 30-minutos nga documentary series maghatag og kahayag sa mga istorya sa mga Pinoy  nga nagpasundayag sa ilang kahibalo ug abilidad sa tibuok kalibutan, samtang naghatag og inspirasyon sa katawhan.

Sa unang episode,  molugwa ang  pole vaulter nga si EJ Obiena, diin iyang ipaambit ang iyang  naagian sukad pagkabata hangtod sa pagkab-ot sa Asian record sa 6.00-meter jump. Sa ikaduhang episode, ipakita ang talento ni Veejay Floresca, nga nailhan sa fashion industry tungod sa iyang abilidad ug adbokasiya. Bag-o lang usab siya nakadaog  sa Project Runway Season 21 ug nakalugwa  sa New York Fashion Week.

Ang “Gamechangers: A Limited Series” gihimo sa Metro Channel uban sa creators nga sila Christina N. Lopez, Lala Ventura, ug Giselle Interior, kauban ang direktor nga si Iggy Bilbao, producer nga si Stacy Alfonso, ug writer nga si River Rosal. Makita ang  “Gamechangers” matag Miyerkules , alas-8 sa gabii, eksklusibo sa iWant platform.