Theater actress na

CEBU, Philippines — Pasok sa cast sa Oedipus Rex sa Tanghalang Ateneo si Marian Rivera. Kini maoy labing una niyang theater project. Wala pa hinuon gipahibawo unsay iyang role apan gipaila ug gipaapil na siya sa production meeting pinaagi sa Zoom.

Nawad-an na’g paglaum

Nagtuo si Claudine Barretto nga dili na gyud magkauli pa ang maayong kabubut-on nila sa iyang mga igsuon, kay alang niya, aduna silay generational curse. Sila sa iyang mga igsuon maoy nagbayad niini, hinungdan nga wala na niya iampo pa nga magkauli sila. Kini maoy gibutyag ni Claudine ngadto kang Luchi Cruz Valdez sa show niini nga Usapang Real Life nga isalida karong Sabado sa gabii puhon sa TV5.

Gipaila na

Si Maria Socorro, ang babaye sa viral video greeting ni Cesar Montano para sa iyang higala duha ka tuig na ang nilabay. Viral ang video sanglit nilabay sa likod ni Cesar ang babaye nga walay sapot samtang nag-FB Live ang actor. Karon sa video greeting ni Cesar alang sa iyang bff nga si Dolly Ann Carvajal, gipaila na niini si Socorro sa publiko ug nagkataw-anay na lamang sila sa nahitabo.

Gihatagan og projects

Malipayon si Myrtle Sarrosa nga bisan og may pandemya ug bag-o pa siyang nipirma og kontrata, wala gihapon siya pasagdi sa GMA Artist Center. Wala man tuod nahinayon ang iyang teleserye unta sa GMA7, apan giapil siya sa online shows sa network nga mao ang Cool Hub at Playlist Time. Ug sunod semana, sugdan na sab niya ang shooting alang sa Mamasapano movie.

Wedding Gown

Niuyon na si Kris Bernal nga dili na engrande ang ilang kasal sunod tuig sa iyang fiancé nga si Perry Choi, gumikan sab sa pandemya ug sa ilang plano nga magpatukod og kaugalingong balay.Apan nihangyo siya nga hugyaw lang gyud ang iyang wedding gown, ug naa gihapon iyang pamilya ug suod nga mga higala sama ni Aljur Abrenic nga kanhi niya ka loveteam, sila si Rayver Cruz ug Megan Young, ug mga batchmates niya sa Starstruck kaniadto.

Na Covid

Positibo sa Covid 19 virus ang pambato sa Sorsogon sa umaabot nga Miss Universe Philippines pageant nga si Maria Isabela Galeria. Siya mismo ang nipahibawo niini sa nilabay nga adlaw diin nangayo siya og dispensa sa iyang mga nahimamat niiing mga nakalabay nga adlaw kay hayan nabutang niya sila sa peligro. Apan niya pa, naningkamot gyud siya nga dili kini mahitabo niya pinaagi sa pagseryoso sa health protocols apan nasakpan lang gihapon siya sa virus.

Workshop

 Nag-acting workshop na sila si Xian Lim, Kylie Versoza, ug Marco Gumabao alang sa umaabot nilang pelikula.

Gippadayag ni Xian pinaagi sa usa ka instagram post nga nalipay kaayo siya sanglit ang iyang mga makauban sa pelikula mga nakatrabaho na niya kaniadto: si Marco sa pelikula nga Corpus Delicti niadtong 2017 ug si Kylie sa Love The Way You Lie karong tuiga.

Grasya

 Dakong grasya matud pa alang kang Angelica Panganiban nga mahatagan og trabaho taliwala sa pandemya, hinungdan nga iyang gidawat ang Walang Hanggang Paalam nga nilugwa na kagahapon sa Kapamilya Online Live, Kapamilya Channel ug sa IwantTFC. Dugang pa, nahunahuna niya nga daghang mawad-an og trabaho kun dili niya dawaton ang project,ilabi na kadtong mga nagsalig lamang sa maong teleserye taliwala niining health ug financial crisis karon.

Lahi nga Project

Lahi matud pa ang Walang Hanggang Paalam sa tanang telserye nga nahimo na ni Zanjoe Marudo hinungdan nga iya kining gidawat pagkabasa niya sa script. Siya mismo mahugyaw sa mga twists sa istorya busa excited siya alang sa mga tumatan-aw niini.

P250K ang plite

Nigasto og mokabat P250, 000 si Miss World Philippines Michelle Dee sa iyang pagsalmot sa international competition didto sa London niadtong December.

Ang maong kantidad maoy nabayad niya isip plete sa iyang mga luggage nga gipangsudlan sa iyang mga gamit sa kompetisyon.

Kini maoy rebelasyon ni Michelle sa iyang latest vlog human may nangutana niya pila iyang nagasto sa iyang wardrobe sa pagsalmot niya sa Miss World pageant.

Tubag ni Michelle nga libre tanan iyang mga gipangsul-ob ug uban pang gamit sanglit may mga sponsors siya, apan nakagasto siya sa plitehan niini aron kompleto iyang mga gamit didto sa London.

"So, to answer your question, for my wardrobe itself, I actually didn't spend anything. But to be honest, most of my spendings went to bringing those seven pieces of luggage all the way to London, and I'm going to be completely honest with you guys and I'm not exaggerating the number, I spent around 4 to 5 thousand dollars just to get all my luggage to London," butyag pa niya.

Apan giklaro niya nga wala siyay pagbasol sanglit dili matud pa mahimo nga kuwangan iyang mga bala alang sa indigay nga gisulong isip representante sa nasud.

"I can't arrive as Miss Philippines with incomplete stuff kasi no queen should arrive with incomplete stuff,” niya pa.

Usa si Michelle sa giisip nga lig-on nga mga kandidata sa maong indigay. Nitapos siya isip kabahin sa Top 12.