Mag-emote sa OMAGIECA!

Happy Friday our dearest readers! Laing adlaw na usab sa pagpanglaag. Nagpanikad na ba mo? Dali na! Ug niining tungora, sa way paglangay langay, atung suroyon ang OMAGIECA sa Oboob, Bantayan!

Usa kini ka lugar sa mga kabakhawan nga anaa nagtungtong sa dakong kadagatan sa suok nga bahin sa Bantayan.

Ang OMAGIECA o Oboob Mangrove Garden Intigrated Ecotourism Conservation Association, usa ka private organization nga nanalipod sa lapad nga kabakhawan nga nahimutang sa Oboob, Bantayan.

Ang nakanindot niini, gawas nga ila kining gi amoma, gibutangan ug gituyukan pod kini nila og mga taytayan paingon sa mga nagkadaiyang pundok sa mga kabakhawan. Hinungdan nga nahimo kining usa sa mga atraksyon nga padayung gidagsa karon sa mga turista sa Bantayan.

Usa sa mga inilang personalidad sa tibuok kalibutan nga nakabisita dinhi mao ang Korean superstar nga si Lee Ji Hoon. Dinhi sab gi shoot ang usa sa mga sikat kaayo nga pelikula nga mitatak gyud sa panumduman sa mga Pilipino nga mao ang Camp Sawi.

Usa sab kini sa mga lugar nga ipasundayag unya matud pa ni Gazini Ganados atol sa Miss Universe Competition.

Matud pa sa kasamtangang Chairman sa Board of Directors sa OMAGIECA Dangs Giducos, nahimugso ang pag-ugmad sa maong lugar niadtong tuig 2005 ug nagsugod kini sa pag operate pagkasunod tuig, ug niadtong August 2013, nahimo kining rehistrado sa DOLE.

Suma total, 14 na kini ka tuig nga nag agni og mga turista sa isla.  Bukas sila gikan sa alas sais sa buntag hangtud alas sais sa gabii.

Gawas sa mangrove tour subay sa dul-an duha ka kilometro nga bamboo trail, pwede sab kang mag-kayaking sulod sa mangrove forest. Aduna sab silay restaurant dinhi nga nag offer og mga nagkadaiyang seafoods lakip na ang bestseller recipe dinhi nila nga “imbao”, usa ka putahi sa shell nga anhi lang makuha sa maong lugar.

Perfect sab ang maong lugar sa bird watching.

Libre ra usab ang mga cottages nga kapahuwayan ug kalingkod lingkoran dinhi.

Nagpanikad na kang moanhi? Pwes! Sayun ra kaayo kini byahion.

Gikan sa North Bus Terminal, mosakay lang ka og bus paingun sa Hagnaya ug moplete ra ka og 160.00. 

Kun anaa naka sa Hagnaya, mosakay na pod ka og ferryboat paingon sa Santa Fe nga may plitehan nga P180.00.  Inig abot nimo sa Santa Fe,mosakay na pod ka’g tricycle paingun sa OMAGIECA ug tsadan, maabot na ka niining maong maanindot nga lugar!

Daghang salamat sa pag-gahin ninyo og igong oras sa pagbasa niining atong artikulo karong adlawa. Hangtod sunod semana na usab! Happy trip!