Gikabangga ni Col. Yape gisubay
CEBU, Philippines — Trabaho ang gisubay sa imbestigasyon sa pagbanhig sa usa ka opisyal sa kapolisan sa may Sitio Molave, Kamputhaw, Dakbayan sa Sugbo.
Matud ni Cebu City Police Office officer-in-charge, Police Colonel Geovannie Maines, nga kini ang mas bug-at nga motibo sa pagpatay kang Police Lieutenant Colonel Joie Yape, nga kanhi hepe sa Cebu Provincial Police Office-Provincial Intelligence Branch.
Matud ni Maines nga posibleng may nabangga nga dakung grupo si Yape o ang bangi sa pipila nga politiko nga mga nadakpan ang posible nga motibo sa pagpamanhig.
“Baka may connection din yun, hindi natin alam. We are still validating,” matud ni Maines.
Adunay duha ka close circuit television (CCTV) footages ang gikuptan sa kapolisan ug gipaubos kini sa enhancement sa hulagway ug video nga nakuha gikan sa mga duol nga establisemento ug gikustodiya sa Regional Anti-Cyber Crime Unit (RACU-7).
Gibutyag usab ni Maines nga gidala na sa Probinsiya sa Misamis Occidental ang patay nga lawas ni Yape.
Samtang gitan-aw pa sa kapolisan kun dunay posibilidad nga koneksyon sa pagbanhig patay kang Clarin, Misamis Occidental Mayor David Navarro sa dalan M. Velez, Capitol Site, Dakabayan sa Sugbo ang kamatayon ni Yape.
Nagpahigayon usab og case conference ang Task Force Yape alang sa dagan sa imbestigasyon sa kaso.
Kahinumduman nga gibanhigan patay si Yape samtang naglakaw paingon sa usa ka mall uban ang asawa niini.
Nanghinaut san ang Commission on Human Rights nga dunay maayong resulta ang Special Investigation Task Group nga giumol ang kapolisan sa pag-imbestigar sa pagpusil patay kang Yape.
Matud sa chief investigator sa CHR-7, Leo Villarino, duna sila’y himoong motu propio investigation mahitungod sa nahitabo kang Yape.
“I hope kana ilang SITG will produce results di naman maayo kay mga criminal are openly committing crimes, they are riding in vehicles and murag atong kapolisan totally unaware kinsa ni sila. I hope dunay mahatag nilang kasulbaran niini,” dugang ni Villarino. GMR (BANATNEWS)
- Latest
