Sheryn sa Banana Nite

CEBU, Philippines - Ang Sugbuanon nga singer nga si Sheryn Regis maoy special guest sa segment sa Banana Nite nga Ihaw Na! karong gabii.  Nasayran nga nagsagunson na ang paglugwa sa singer sa nagkadaiyang programa sa telebisyon.

Usa sa gi-promote karon ni Sheryn mao ang concert nila ni Angeline Quinto didto sa Dubai karong Abril 4 nga nag-ulohan og A Night With The Ultimate Divas.

Nahimo usab nga guest si Sheryn sa concert ni Rachelle Ann Go sa miaging gabii kung diin nakauban niya sila si Jimmy Marquez, Mark Bautista, Erik Santos, Christian Bautista ug Regine Velasquez. (Sanden J. Anadia)

Mark miangkon nga dunay anak

Giangkon ni Mark Herras nga aduna na siya'y tulo ka buwan nga anak nga ginganlan og Ada ug iyang gipasalig nga dili niya talikdan ang iyang mga responsibilidad niini.

Sa programang StarTalk kagahapon, gipadayag sa 27-anyos nga aktor nga 32-anyos ang edad sa inahan sa bata busa lima ka tuig ang gap sa ilang edad apan iyang giklaro nga wala sila mag-ipon  niini apan duna sila'y kasabotan nga magtinabangay sa pagsustento sa ilang anak alang sa kaugmaon sa bata.

Nangayo usab si Mark og pasaylo ngadto sa iyang ex-girfriend nga si Ynna Asistio gumikan kay siya gyud ang nakasala sa ilang relasyon niadto sanglit uyab pa sila niini sa dihang nagsabak ang babaye nga maoy inahan sa iyang anak.

"Hindi ko na po kaya ang mag-deny, siyempre mahal ko yung bata. Nandyan na po yan, kaya paninindigan ko ang mga responsibilidad ko bilang ama, " suma pa ni Mark.

Nihangyo usab siya sa iyang fans nga unta dili kini maglagot kaniya ug aminado siya nga igo lang niya nga giprotektahan ang iyang career niadto busa karon pa lang siya niangkon nga duna siya'y anak.

Suma pa sa nasagap nga tsika sa Banat News Hugyaw kagahapon, ginganlan og Dianne ang inahan sa bata ug former handler kini sa aktor.