Tuesday nahiubos sa GMA

CEBU, Philippines - Nahiubos og maayo si  Tuesday Vargas sa mga dagkong tawo nga nagpaluyo sa Laf En Roll ug  Show Me Da Manny sa GMA-7 human siya gitangtang sa maong mga programa gumikan sa pagtikang niya sa TV5.Hinuon wala magmahay si Tuesday gumikan kay nagbaha usab karon ang iyang mga proyekto sa Kapatid Network.

Pagbalik ni Bong gipangandaman gyud

Makita na pagbalik si Sen. Bong Revilla Jr. sa programang “Kap’s Amazing Stories” sa GMA-7 karong gabii human sa taas nga panahon nga nawala sa telebisyon gumikan sa eleksyon. Makita usab si Bong sa “Kapuso Movie Festival” karong udto pinaagi sa pelikula niya kaniadto nga “Captain Barbell” sa Viva Films. Guest usab siya sa musical variety show nga Party Pilipinas. Samtang makita ang senador sa 60th Anniversary GMA Network ID nga nag-ulohan og “Tagumpay ng Kapuso”.

Direk Andoy nag-sorry kang Jhake

Mipagawas na og statement ang GMA-7 kabahin sa insidente nga nahiaguman nila ni Jhake Vargas , ang manager niini nga si German Moreno ug ang direktor sa seryeng First Time nga si Andoy Ranay. Matud pa nga nangayo na og pasaylo si Direk Andoy sa nabuhat niya kang Jhake. Matud pa nga andam nga mahimong tulay ang GMA-7 aron magkauli ang duha ka kampo. Kahinumduman nga nagsugod ang isyu sa dihang gikasab-an og maayo ni Direk Andoy si Jhake sa taping sa First Time gumikan kay nakalimot kini sa iyang linya.