Rochelle Pangilinan co-prod sa Mama Mama!

Pagkalipas ng dalawang dekada, opisyal nang nagbabalik sa mundo ng musika ang SexBomb Girls dala ang kanilang pinakabagong single na  Mama Mama.

Ito ay hudyat ng isang espesyal at bagong yugto para sa iconic na grupo—at isang mahalagang milestone para sa founding member at lider na si Rochelle Pangilinan, na ngayo’y tumatayo na rin bilang co-producer.

Huling gumawa ng ingay sa musika ang SexBomb Girls sa pamamagitan ng mga release tulad ng Sumayaw, Sumunod: The Best of the SexBomb Girls noong 2005 at Daisy Siete: V-Day noong 2006.

Ngayon, makalipas ang halos 20 taon, nagbabalik si Rochelle hindi lamang bilang performer, kundi bilang bahagi rin ng creative force sa likod ng kanilang pinakabagong handog na musika.

Para kay Rochelle, ang Mama Mama ay patunay ng kanyang pag-unlad bilang isang artist—mula sa pagiging isa sa mga kababaihang humubog sa panahon ng SexBomb hanggang sa pagyakap sa mas malaking papel sa likod ng mga eksena bilang producer.

Kasabay ng bagong single ang isang music video na nagtatampok sa pagsasama ng SexBomb Girls at ng mga sumisikat na P-pop acts ngayon.

Pinagdurugtong nito ang dalawang henerasyon ng Filipino pop habang ipinagdiriwang ang matibay na samahan, walang kupas na kariktan, at pangmatagalang legasiya ng grupo.

Mula nang ilabas ito, more or less at meron na itong two million views na nagpapatunay na patuloy na tumatatak sa mga manonood ngayon ang SexBomb Girls.

Sa pamamagitan ng Mama Mama, pinatutu­nayan nina Rochelle at ng SexBomb Girls na may mga bagay na lalong gumaganda sa paglipas ng panahon.

Matapos ang matinding tagumpay ng kanilang mga reunion concert at ang mainit na pagtanggap ng mga tagahanga, ibinabalik ng grupo ang parehong enerhiya sa musika pagkalipas nang halos 20 taon—isang patunay na nananatiling matindi at buhay na buhay ang SexBomb magic.