Gerald gi-deny ang pagduaw kang Pauleen

Di ikasulting nasuko o frustrated si Pauleen Luna sa gihimong denial ni Gerald Anderson sa pagduaw niini ngadto kaniya ug ang pagdala og pagkaon sa mismong studio sa Eat Bulaga. Siguro nadismaya lang siya kay wa siya makasabot nganong kinahanglan pa kining i-deny sa young actor.

Una, wa kini gipakatag ni Pauleen. Mao siguro nga milugwa kadto kay daghan ang nakakita sa pag-adto ni Gerald. Apan siyempre maghuna-huna usab si Pauleen kung unsa ba gyud ang motibo sa aktor kay nangisog gyud kini sa pag-adto sa studio sa Eat Bulaga unya mo-deny lang diay.

Aduna’y miingon nga basin nahadlok si Gerald sa gisulti sa iyang ka-love team nga si Kim Chiu nga kung tinuod man gani ang tsismis, labing maayo pa nga di na lang sila i-love team diin mao kini ang hinungdan sa maayong career ni Gerald karon.

Pwede usab nga gibadlong siya sa ABS-CBN sa iyang pag-adto sa studio sa show ni Pauleen nga nakapasakit sa ilang ulo tungod kay di gyud kini nila malupig.

Kung unsa man gani ang tinuod nga hinungdan nga kinahanglan nga mo-deny si Gerald, wa gyu’y nakahibawo, apan di man mabasol si Pauleen kung madismaya man siya sa gibuhat ni Gerald.

Usahay, kinahanglan nga una mobuhat ang usa ka lalaki og usa ka butang, angayan nga hunahunaon una kini sa makadaghan aron di mag-sige og deny ug di kauwawan ang gibuhat.

Karylle dunay nakitang problema kang Dingdong

Giangkon na karon ni Karylle nga naa’y mga problema kang Dingdong Dantes nga wa niya nakita, o labing gipili na lang niyang di tan-awon kaniadto tungod kay nahigugma siya pag-ayo sa aktor. Karon nga nahigmata na siya ug nakaamgo nga dili diay ingon niadto ka simple ang tanan. Si Karylle pa mismo ang nakigbuwag sa aktor.

Kung pangutan-on na gani si Karylle kung posible pa ba ang ilang reconciliation, ang iyang tubag “dili gyud”.

Mabantayan nga aduna gyu’y bug-at nga rason nganong di pa motug-an si Karylle sa panagbuwag nila ni Dingdong.

Dra. Vicki Belo wa magdahom

Wala man si Dra. Vicki Belo diin toa sa Las Vegas karon kauban ang boyfriend nga si Dr. Hayden Kho aron mosaksi sa Pacquiao-De La Hoya fight, gilipay gihapon sa iyang anak nga si Cristalle ang Chistmas party pinaagi sa pagpanghatag og mga cellphones ug cash prizes. Gikan kang Cristalle, nasayran nga mid-year sa 2008, nga gilusad nila ni Sarah Geronimo isip usa sa mga endorsers sa Belo Essentials, sama nila ni Lucy Torres, ZsaZsa Padilla, ug Regine Velasquez, dako pud ang gitas-on sa sales niini, mao nga grabe ang pagpasalamat nila kang Sarah.

Bag-o pa lang nilang gilusad sila Bea Alonzo ug Claudine Barretto.

Aduna sila’y bag-ong produkto nga ilusad sa 2009 apan di pa mahimong isulti kung unsa kini ug kinsa ang endorser.