Scrap and Metal sa Flirt

Brrr! Tugnaw ang huyohoy nga nasinati nato sa pagsulod ning semanaha. Nanulod gyod ang duha ka mga bagyong nasigpatan sa Philippine area of responsibility. Dili na gyod matabang ang mga bagyo kay molihis-lihis na ni’s agianan ug bisan pa’g Mayo pa ron, nagtipas-tipas na ang bagyo sa atong tugkaran. Gani, natayhopan na sab ta’s malumong huyohoy ni Cosme, ang bagyong nagsunod kang Butchoy.

Sa una, moingon lang ang kadaghanan nga overreacting ra ning atong mga kabalaka sa unsay mamahimong epekto sa global warming, apan karon mga naglagat na kitang saksi sa pagyabag sa panahon – kun init makasiak sa alimpulo ug kung mouwan sab makapapha’s yuta. Akong awhag nga mag-amping lang tang naa duol sa mga riverbanks ug landslide-prone areas nanagpuyo ha? Hinaot pa nga naka-organize na inyong mga kabarangayan og disaster coordinating team aron katabangan kamo in the event of landslides, flashfloods and other natural disasters. Dili na lang ko manimbako kay nahitabo na kining tanan, unsaon man nga tungod sa climate change nausab naman ang gidaghanon sa rainfall. Kun sa una, kinabo-kabo lang, karon binaldosa naman. Manghinaot na lang ko nga sa panahon sa atong kalisdanan, tagaan ta’g igong kusog nga makasugakod pag-atubang niini.

* * *

Gikalipay kaayo nako ang balita nga nahilakip diay sa listahan sa official lineup sa SMB events ang Bisrock band, Flirt. Kining Flirt kabahin ni’s labing unang mga banda nga akong nabuhatan og feature niadtong 2006 alang sa The FREEMAN ug dinhi sa Banat News. Official band na sila sa San Miguel Beer events kay nadawat man sila human makabuhat og live audition sa dihang gipahigayon ang nightly entertainment sa kasaulogan sa Kadaugan sa Mactan ning bag-ohay pa lang. Kuyog nilang nahimong official bands sa habig sa Bisaya rock ang Agipo, Indephums ug Assembly Language. Kini matod pa’s gitaho ni Carl Michael Geverola, ang bahista sa Flirt.

Malamposon nga nalusad ang ilang album nga giulohan og “Scrap and Metal” sa 626 Tapsilog diha sa dakbayan sa Lapu-Lapu niadtong Marso 7, ning tuiga. Bag-o na kuno ang ilang lineup kay si Jovanie “Gogo” Trinidad ni-shift naman sa showband ug busy na sab kuno sa iyang trabaho. Si Junie Quirubin (di ba Querubin ang spelling?) mao ang ilang drummer, si Julius Balbuena sab ang vocals, samtang si Armin Yaun mao ang ilang gitarista, ug si Carl ang bahista. May usa pa sila ka sakop nga maoy ikaduhang gitarista katimbang ni Armin apan mihangyo nga tagoon lang sa ang iyang identity karon tungod kay ginadili man sa ilang tinohoan ang pag-apil-apil og mga rock bands nga ang mga kanta “iya sa kalibotan”. Unsaon man nga alternative emo-punk man ning Flirt, dili man contemporary Gospel ang genre.

Nalipay ko nga nagsud-ong sa ilang album kay mao na kini ang bunga sa ilang mga tingusbawan isip usa ka lokal nga banda. Kanhi, ila lang ning gidamgo – niadtong unang yugto sa among panagkaila. Karon ang album naghiklin sa ilang mga orihinal nga komposisyon nga may mga ulohan nga Bitoon, Sabaw, Palaaway, Luha sa Bao, Laagan, Demalas, Somehow, ug ang labing unang kanta nga ilang gisumite sa Smash FM – ang Nailad nga karon kabahin na’s “Bisrockathon” segment sa “BisrocKabataan” sa tulumanon ni DJ Ram. Bilib sab ko aning Anna Marie Ngujo (genuflect mong tanan!) kay siya mitabang og prodyus sa album. Kani si Ann, usa ni’s mga lunod-patay’ng Bisrockers nga klarong misuporta sa mga Bisrock bands ug sa kawsa sa Bisrock movement sukad kini mahimugso niadtong 2006. Na-record ang maong album sa Backyard Studio Project sa Lahug. Ang CD inlay ug packaging design/layout gimugna ni Don Jomer Perez ug Ruben Agustin, Jr. samtang ang front cover design niini bunga sa imahinasyon ni Junie Quirubin (di gyod ni Querubin sa?).

Mapalit na ang “Scrap and Metal” album sa Manu ug sa Smash sa tag P150. Ang Manu naa sa second floor sa E-Mall samtang ang Smash naa sa Vimcontu compound sa Pier 1, likod sa Waterfront Police Station.

Atangi diay ang ilang ikaduhang album (actually ikatulo na ni kun iapil og ihap ang ilang EP nga nag-ulohan og “Flirt”) nga may working title nga “Start of January”. Ang carrier single niini mao ang “Prisoners of War” mahitungod sa atong pakigbatok sa nagkalandrakas nga matang sa gubat ning kinabuhi-a. Sugod na sab og tirada’g English songs ang Flirt aron mapalapdan ang playing field sa alternative emo-punk dinhi sa Sugbu.

Shoutouts: Mapasalamaton ang bandang Flirt nilang Jesel Sumalinog ug sa iyang pamilya, ni Junie Balbuena, DJ Ram Dizon sa 93.1 Smash FM, sa The FREEMAN ug BANAT family, ni Zen Go ug Nash Maquiling sa Assembly Language, sa tanang ginikanan nga nagsuporta sa ilang banda, tanang taga Lapu-Lapu labi na diha duol sa Mactan Benito Ebuen Air Base, ug sa Variant Design. Bisitaha ang ilang webpage sa purevolume.com/flirts. For bookings, please call 3424568 or text 09196011831.