NLEX tuloy sa pananalasa
MANILA, Philippines — Tuloy pa rin ang arangkada ng NLEX matapos sagasaan ang Converge, 119-107, upang mapanatili ang malinis na kartada sa PBA Season 50 Governors’ Cup kahapon sa Smart-Araneta Coliseun.
Muntik pa maubusan ng gasolina ang Road Warriors subalit nakaalpas pa rin sa dulo upang palawigin sa 5-0 ang kanilang unbeaten record sa tuktok ng Group A.
Reigning champion na Talk ‘N Text nalang ang nasa listahan ng NLEX sa Martes para sa kampanya nito sa 1st round upang mapalakas ang tsansa sa Top 4 na siya lang makakapasok sa crossover playoffs kontra sa Group B.
“First of all, I give glory to God for putting me in position to coach this group,” ani bagong NLEX head coach Jimmy Alapag, dating PBA legend bago bumalik sa PBA mula sa NBA kung saan siya nakasama sa Sacramento Kings bilang assistant coach.
Nagtambal sina DeQuan Jones at Schonny Winston sa scoring tampok ang 28 at 24 puntos, ayon sa pagkakasunod, upang trangkuhan ang balanseng atake ng Road Warriors na mainit ang naging simula bago manlamig para sa muntikang silat.
All-around na 19 puntos, 9 rebounds at 10 assists naman ang kinolekta ng ace guard na si Robert Bolick habang may 15 at 14 puntos sina Anthony Semerad at Kevin Alas, ayon sa pagkakasunod.
Sumakay ang NLEX sa 14-3 ratsada upang simulan ang 4th quarter upang kumawala sa Converge na nakatabla sa 88-88 matapos mabugbog sa hanggang 19 puntos.
At wala nang preno-preno para sa Road Warriors mula roon tungo sa 12-puntos na tagumpay bilang magandang pakundisyon nila bago hamunin ang TNT.
Nadiskaril ang pagbabalik ni Jamaal Franklin sa PBA kapalit ni Jalen Hudson sa kabila ng 26 puntos sahog pa ang 5 rebounds, 6 assists at 4 steals para sa Converge na sumadsad sa 3-0 kartada matapos ang 3-0 simula.
Nauwi rin sa wala ang 18, 16, 14, 13 at 11 puntos nina Mikey Williams, Justin Arana, Juan Gomez De Liaño, Justine Baltazar at Alec Stockton, ayon sa pagkakasunod, para sa FiberXers ni coach Dennis “Delta” Pineda.
- Latest
