Lady Vietnamese pumalag sa holdap, sinaksak

Pinasok ng suspek sa sasakyan
CAVITE, Philippines — Isang 27-anyos na babaeng Vietnamese ang sugatan makaraan siyang saksakin ng isang hinihinalang holdaper na biglang pumasok sa loob ng kanilang sasakyang van na minamaneho ng Chinese national sa kahabaan ng highway sa Pasay City, hanggang sa makarating sila sa Bacoor City kaya nakahingi ng tulong, kamakalawa ng gabi.
Ibinaba sa Brgy. Talaba 2, Bacoor City ng kasama nitong babaeng Chinese national na nagsilbing driver ng van, ang biktima na duguan at nanghihina nang makita ng ilang concerned citizen at dinala sa kanilang Barangay Hall bago itinakbo sa pagamutan.
Sa imbestigasyon ng pulisya, alas-8:30 ng gabi nang sunduin umano ang biktimang si alyas “Le Thin”, 27-anyos, Vietnamese, ng kanyang kaibigang Chinese na nagmamaneho ng AUV Toyota Innova sa may E-Com Building sa Pasay City.
Habang ang dalawa ay bumabagtas sa isang kalsada, tumigil ang nasabing sasakyan at may isang lalaki na lang ang biglang nagbukas ng pinto ng kanilang sasakyan at sumakay.
Pag-upo ng suspek sa nasabing kotse ay agad nitong hinalbot ang bag ng biktima, cellphone at mga alahas. Nang ayaw ibigay ng nasbaing lady Vietnamese ang mga kagamitan ay pinagsasaksak siya sa dalawang hita at tiyan bago mabilis na tumakas ang suspek.
Sa hindi pa masabing motibo, nagtuluy-tuloy umano sa pag-drive ang Chinese driver hanggang sa makarating sila ng duguang Vietnamese sa Talaba 2, Bacoor City kung saan dito na ibinaba ang biktima na nakita naman ng ilang concerned citizen at dinala sa kanilang Barangay Hall bago itinakbo sa pagamutan.
Nagsasagawa na ng imbestigasyon ang pulisya at inaalam kung ang babaeng Chinese na kasama ng biktima ay kasabwat sa insidente ng panghoholdap.
- Latest
















