Kubrador sa perya, itinumba ng mananaya

MANILA, Philippines — Isang 34-anyos na kubrador ang nasawi nang siya ay barilin ng isang mananaya ng perya dahil sa hindi pagkakaunawaan, naganap kamakalawa sa Barangay Guimbala-on, Silay City, Negros Occidental.

Kinilala ang nasawing si Allan Tamparong, ng Binalbagan, Negros Occidental.

Sinabi ni Police Lt. Col. Mark Anthony Darroca, Silay police chief,naglalaro ang suspek na si Pedrito Penafiel nang magkaroon umano sila ng mainit na argumento ng biktima dahil sa taya.

Sa gitna nang pagtatalo ay bumunot ng baril ang suspek at binaril ang biktima bago ito tumakas.

Patuloy ang imbestigasyon ng pulisya sa kaso habang tinutugis ang suspek.