Kandidatong tserman pinasok ng 5 maskarado, P.2 milyon tangay
LUCENA CITY, Philippines —Nasa P200,000 cash ang natangay ng limang maskaradong lalaki matapos umano nilang pasukin at pagnakawan ang bahay ng isang kandidato sa pagka-chairman ng Barangay Barra sa lungsod na ito nitong bisperas ng Barangay at Sangguniang Kabataan Elections (BSKE) 2023.
Ayon sa ulat ng Lucena City Police, bandang alas-11:00 ng umaga ay dumating sa nasabing barangay ang isang kulay gray na van na lulan ang limang lalaki na pawang nakasuot ng kulay itim at puting face mask at armado ng mga baril.
Hinahanap umano ng mga suspek ang kumakandidato sa pagka-kapitan ng Barangay Barra na si Kent Rigor Adversario, 30, at nang hindi makita ay pinasisipa hanggang sa masira ang pintuan ng bahay nito.
Nang makapasok sa bahay ang mga suspek, sinabayan ni Adversario ng pagtakas sa pamamagitan ng pagdaan sa likurang pinto ng kanyang tahanan.
Nang bumalik ang biktima sa kanyang bahay makalipas ang isang oras ay natuklasan niyang nawawala na ang nabanggit na halaga ng pera na nakalagay sa isang durabox.
Nagsasagawa pa ng imbestigasyon ang pulisya upang makilala ang mga suspek at upang malaman kung may kaugnayan sa eleksyon ang pangyayari.
- Latest