Bahay nabagsakan ng malaking bato, bebot patay
Burol gumuho sa Antipolo City…
MANILA, Philippines — Patay ang isang babae nang mabagsakan ng isang malaking bato ang kanilang tahanan matapos gumuho ang isang bahagi ng burol na lumambot dahil sa malalakas at walang tigil na pag-ulan sa Antipolo City kamakalawa.
Dead-on-arrival na sa Rizal Provincial Hospital Annex III ang biktimang si Catalie Perez Diongco dahil sa matinding pinsalang tinamo sa kanyang ulo at katawan.
Lumilitaw sa ulat ng Antipolo City Police na dakong alas-3:00 ng madaling araw nang maganap ang landslide sa tahanan ng biktima sa Sitio Puting Bato 1, Brgy. San Luis, Antipolo City, Rizal.
Nabatid na mag-isa umano ang biktima sa kanilang bahay nang bigla na lang gumuho ang isang lumambot na bahagi ng burol sa lugar dulot ng mga pag-ulan.
Dahil dito, nabagsakan ng malaking bato ang bahay na nagresulta sa pagkamatay ng biktima na noon ay nasa kahimbingan pa ng pagtulog.
Kaagad naman siyang naisugod ng mga rescue team sa pagamutan ngunit hindi na umabot pang buhay.
- Latest
