Tiyo kinatay ng may topak na pamangkin
Bacacay, Albay, Philippines — Kalunus-lunos na kamatayan ang sinapit ng isang 50-anyos na binata matapos pagsasaksakin ng kanyang sariling pamangkin na sinasabing sinumpong ang sakit sa pag-iisip sa Purok 2, Brgy. Tambilagao ng bayang ito, kamakalawa ng umaga.
Tinangka pang isugod ng mga kamag-anak ang biktima na kinilalang si Marlon Berja Benasa, sa Cagraray District Hospital pero idineklarang dead-on-arrival ng sumuring doktor.
Isinuko naman sa mga rumespondeng pulis ng kanilang mga kaanak ang suspek na si Mike Barro Benosa, 21-anyos, binata at residente sa nasabing purok.
Sa ulat, dakong alas-10 ng umaga habang nagsisiga sa kusina ang biktima para magluto nang lapitan ng suspek at ilang beses na pinagsusuntok.
Dahil alam na may sakit sa pag-iisip ay umiwas na lamang ang biktima pero bigla na lang siyang hinabol ng pamangkin na may hawak na patalim.
Nang maabutan ang biktima ay ilang beses siyang pinagsasaksak ng suspek sa iba’t ibang bahagi ng kanyang katawan na duguang humandusay.
Pinagtulungang disarmahan ng mga kamag-anak ang suspek at inagaw ang hawak na patalim saka isinuko sa mga pulis.
- Latest
