Bus bumaliktad: Mag-asawa dedo, 4 pa sugatan
SANTIAGO CITY, Isabela, Philippines — Patay ang mag-asawa habang apat na iba pa ang nasugatan matapos bumaliktad ang isang pampasaherong bus sa kahabaan ng national highway sa Naguilian sa lalawigang ito kamakalawa.
Kinilala ng Naguilian Police ang mga nasawi na sina Myrna Corpuz at Oliver Corpuz, kapwa residente ng Barangay Andres Bonifacio, Diffun, Quirino.
Kinilala naman ang iba pang sugatan na lulan ng Victory bus (CXU 844) na sina Richelle Dutdut, 43, kundoktor ng bus; Dominador Antolin III, 23; Marvin Balinag, 34, isang sundalo, at Wilmer Dumo, 28, miyembro rin ng Armed Forces of the Philippines.
Ang mga biktima ay isinugod ng mga rumespondeng rescue personnel sa GFNDy Memorial Hospital sa City of Ilagan at PMPC Memorial Hospital sa bayan ng Naguilian.
Batay sa inisyal na ulat, pumalya umano ang preno ng bus na minamaneho ni Jerome Rivera, 46, residente ng Calaocan, Santiago City na naging dahilan para ito ay bumaliktad bago sumalpok sa poste ng kuryente pagsapit sa madulas at pababang bahagi ng kalsada sa Barangay San Manuel dulot ng patuloy na pag-ulan.
- Latest
