Dayong ‘tulak’ huli sa P1.02 milyong shabu
CABANATUAN CITY, Nueva Ecija, Philippines — Timbog ang isang dayong ‘tulak’ umano ng droga makaraang mahulihan ng mahigit sa isang milyon pisong hinihinalang shabu sa isinagawang drug buy-bust operation sa Barangay Bantug Bulalo, kahapon ng umaga.
Kinilala ni P/Lt. Col. Carl Omar Fiel, hepe ng pulisya rito, ang suspek na si Arnold Palacio, 40-anyos, tubong Cabanatuan City at ngayon ay naninirahan sa bayan ng Baler sa Aurora.
Nahuli ang suspek sa buy-bust operation na inilatag ng drug enforcement team ng pulisya rito sa pakikipagkoordinasyon sa Philippine Drug Enforcement Agency-Regional Office 3 (PDEA-RO3), dakong alas-5:57 ng umaga nitong Biyernes.
Nasamsam sa suspek ang may 22 plastic sachet ng umano’y shabu na may timbang na 150 gramo na sa pagtaya ng Dangerous Drugs Board ito ay nagkakahalaga ng P1,020,000.
Ayon kay Fiel, bago mag-Holy Week, nagsumbong sa kanilang tanggapan ang ilang residente na may magaganap na transaksyon ng droga na sangkot ang suspek kaya isang linggo siyang minonitor hanggang sa matiyempuhan at maaresto.
- Latest