5.2 magnitude na lindol, tumama sa Batanes
MANILA, Philippines — Niyanig ng 5.2 magnitude na lindol ang Batanes nitong Sabado ng gabi.
Batay sa inilabas na bulletin ng Philippine Institute of Volcanology and Seismology (Phivolcs), nabatid na dakong alas-9:53 ng gabi nang tumama ang lindol sa Basco, Batanes.
Anang Phivolcs, ang epicenter ng naturang lindol na tectonic ang origin ay natukoy may 40 kilometro sa hilagang silangan ng Basco. Ito ay may lalim na 29 kilometro.
Naramdaman din umano ang Intensity 3 sa Basco.
Ayon kay Phivolcs Director Renato Solidum, ang lindol ay dulot ng fault na nabuo nang ang kontinente ng Asya ay bumangga sa tip ng northern Luzon.
“Sa Batanes kasi maraming fault sa lupa, at ito ay dulot ng collision ng kontinente ng Asia doon sa dulo ng northern Luzon. Ang Batanes at Taiwan island ay collision zone, binabangga, kaya paminsan-minsan ay may lindol sa dagat na nararamdaman ng mga isla malapit sa Batanes,” paliwanag pa niya sa isang panayam sa telebisyon.
Wala naman umanong inaasahang pinsalang naidulot ang naturang lindol ngunit asahan na ang pagkakaroon ng mga aftershocks.
- Latest