Bayan sa Apayao ni-lockdown, 1 kaso ng Delta variant naitala
BAGUIO CITY , Phiilppines – Inilagay kahapon sa lockdown ang bayan ng Pudtol sa Apayao upang makapagsagawa ng agresibong mass testing at heightened contact tracing matapos na kumpirmahin ng Apayao Provincial Inter-Agency Task Force (PIATF) na nakapasok na rin ang Delta Variant ng COVID-19 sa Cordillera Administrative Region (CAR).
Ito ay matapos na ipagbigay-alam ng Philippine Genome Center (PGC) nitong Agosto 6 ang resulta ng kanilang pagsusuri sa isang pasyente na na-infect ng Delta variant noong nakalipas na linggo ng Hulyo.
Sinabi ng Department of Health (DOH) Cordillera na bagama’t nakarekober na ang nasabing pasyente, magsasagawa pa uli ng beripikasyon ang Regional Epidemiology Surveillance Unit (RESU) team kabilang dito ang paghahanap nila sa mga naging close contacts ng pasyente.
Tiniyak naman ni Apayao Governor Eleanor Bulut-Begtang sa kanilang mamamayan na kontrolado pa rin nila ang sitwasyon sa lalawigan.
Sinabi Begtang na ang PIATF at ng Pudtol IATF ay nagsasagawa ng malawakang paghahanap sa mga indibiduwal na nakasalamuha ng naturang Delta variant patient at ipasailalim sila sa RT-PCR testing.
- Latest
